«Ձեզ համար, կանայք» մեկամսյա առողջապահական ակցիայի շրջանակում նախորդ շաբաթ քաղաքապետարանի ենթակայության համաբուժարաններ է դիմել 6927 կին, որից 4741-ը տեղում համապատասխան հետազոտություններ է անցել:
Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, աշխատանքային հերթական խորհրդակցության ժամանակ նշվել է նաև, որ 35 կին ուղեգրվել է համակարգչային տոմոգրաֆիայի, ևս 1424-ը ստացիոնար բուժման, իսկ 64 կին արդեն վիրահատվել է: Քաղաքապետ Տարոն Մարգարյանը հանձնարարել է գործընթացը պահել մշտական հսկողության տակ:
Վերահսկողության վարչության պետը զեկուցել է, որ նախորդ շաբաթ Երևանի քաղաքապետարանում և վարչական շրջաններում գործող «թեժ գծերի» հեռախոսահամարներով ստացվել է 198 հեռախոսազանգ: Բարձրացված հարցերից 157-ին համապատասխան լուծում կամ պատասխան է տրվել, իսկ մնացածն առայժմ կատարման ընթացքում է:
Խորհրդակցության ընթացքում մանրամասն ներկայացվել է Երևանի քաղաքապետարանի և վարչական շրջանների կողմից Հայոց ցեղասպանության 100-ամյա տարելիցին նվիրված միջոցառումների ծրագիրն ու ժամանակացույցը: Զեկուցվել է նաև, որ ծրագիրը համապատասխան հանձնաժողովի նիստում ներկայացնելուց հետո կներկայացվի նաև հանրությանը:
Քաղաքապետ Տարոն Մարգարյանը հանձնարարել է նախապատրաստական աշխատանքներ տանել և առաջարկություններ ներկայացնել առաջիկայում Անրի Վեռնոյի անունով անվանակոչված փողոցի հանդիսավոր բացումը պատշաճ կազմակերպելու համար:
