Ուկրաինական հետազոտողները Ղրիմի ափերի մոտ հայտնաբերել են սովետական սուզանավ, որն այդտեղ է մնացել Հայրենական Մեծ պատերազմից ի վեր: Այդ մասին հաղորդում է մշակութային ժառանգության պահպանման «АРК» կոմիտեն: Սուզանավը հայտնաբերվել է Տերխանկուտ հրվանդանի մոտ «Սոֆոկլ-1» ստորջրյա սարքի փորձարկման ժամանակ: Այն գտնվում է 52 մետր խորության վրա: Կոմիտեի տեղեկատվությամբ խոսքը «Щ-216» տիպի սուզանավի մասին է, որը անհետ կորել էր 1944թ.-ին՝ մարտական առաջադրանք կատարելիս: Նավը գտել են «Ստորջրյա հետազոտությունների սևծովյան կենտրոնի» աշխատակիցները: Կենտրոնի տնօրեն Սերգեյ Վորոնովը հայտնել է, որ «սուզանավը խորասուզվել է ոչ այնքան մեծ վնասվածքներով: Ջուրը նրա մեջ թափանցել է միայն մեկ բաժանմունքի մեջ: Մյուս 6 բաժանմունքները անվնաս են: Դա ակնհայտ երևում է ծովի հատակի վրա նավի պարկած դիրքից: Այն ոչ թե մխրճված է հատակի մեջ, այլ ուղղակի տեղավորված է հատակի վրա»: Վորոնովը տեղեկացրել է նաև, որ հիմա նախապատրաստվում են անհրաժեշտ փաստաթղթեր՝ սուզանավը ծովից հանելու համար: Ղրիմի վարչապետ Անատոլի Մոգիլյովը այս գտածոն համարել է «Ուկրաինայի համար նշանավոր իրադարձություն»: «Անհրաժեշտ է գտնել անձնակազմի հարազատներին և վերահուղարկավորել զոհվածների մասունքները: «lenta.ru»-ն նշում է, որ սուզանավի անձնակազմը բաղկացած է եղել 47 մարդուց: Հաղորդագրությունը նաև նշում է, որ խորտակված նավի բարձրացման աշխատանքները կսկսվեն այս ամառ: Հետագայում պլանավորվում է, որ սուզանավը կվերածվի թանգարանի: «Շչուկա» տիպի սուզանավերն ակտիվորեն մասնակցել են Հայրենական պատերազմի ծովամարտերին: Կռված 44 «Շչուկա»-ներից 31-ը մարտերի ընթացքում շարքից դուրս են հանվել: 2002թ.-ին այս տիպի խորտակված մի սուզանավ էլ հայտնաբերվել է Բուլղարիայի ափերին՝ տեղացի ձկնորսների կողմից: