Այսօր ՀՀ գլխավոր դատախազության շենքի դիմաց տեղի է ունեցել բողոքի ակցիա' ի պաշտպանություն խոտի դեզ այրելու մեջ մեղադրվող երիտասարդ Արամ Մուղալյանի եւ նրա ընկերների: Հավաքվածները նշել են, որ 4 երիտասարդներին առաջադրված մեղադրանքն անհիմն է, եւ նրանց արդեն 5 ամիս դիտավորյալ պահում են անազատության մեջ: Ավելի շուտ դատախազ Դավիթ Սարգսյանը ընդունել է Արամ Մուղալյանի մորը եւ փաստաբանին: Վերջիններս դատախազին հանձնել են դիմում, իսկ Դավիթ Սարգսյանը վստահեցրել է, որ խնդրի վերաբերյալ գլխավոր դատախազությունում քննարկում կլինի: Լրագրողների հետ զրույցում Արամ Մուղալյանի մայրը նշել է' եթե իր որդուն ազատ չարձակեն, եւ արդարացի դատավարություն չլինի, ապա իրենք կդիմեն Եվրադատարան: