«Թալիբան» շարժման ներկայացուցիչներն այն կարծիքին են, որ Աֆղանստանի իշխանություններին չի հաջողվել բարձր ներկայություն ապահովել երկրի նախագահի ընտրություններում: Այդ մասին ապրիլի 8-ին հաղորդել Է EFE գործակալությունը:
Խռովարարները հավաստում են, որ, ըստ իրենց տվյալների, ապրիլի 5-ի քվեարկությանը ընտրողների մասնակցությունը կազմել Է 10 տոկոսից Էլ պակաս:
«Դա կատարյալ աղետ Է եւ ձախողում»,-նշել են թալիբները Համացանցում հրապարակված հաղորդագրության մեջ:
EFE-ն նշում Է, որ, ըստ պաշտոնական տվյալների, ընտրություններին մասնակցությունը կազմել Է շուրջ 60 տոկոս այն դեպքում, երբ 2009 թվականի ընտրություններում այդ ցուցանիշը միայն 38 տոկոս Էր:
Մինչդեռ, ՄԱԿ-ի գլխավոր քարտուղարը շնորհավորել է աֆղան ժողովրդին երկրում անցկացված ընտրությունների կապակցությամբ: Պան Գի Մունը նշել Է, որ Աֆղանստանում ապրիլի 5-ին կայացած նախագահական եւ մունիցիպալ ընտրությունները կարեւոր քայլ են դարձել երկրի պատմության մեջ առաջին դեմոկրատական իշխանափոխության ճանապարհին: ՄԱԿ-ում տարածված հայտարարության մեջ նա աֆղանցիներին դրվատել Է համարձակության, իրենց իրավունքները պաշտպանելու ձգտման եւ հանուն երկրի ապագայի պայքարելու համար: «Աֆղանցիները չվախեցան սպառնալիքներից ու ճնշումներից՝ իրականացնելով ձայնի իրենց իրավունքը: Դրանով իսկ նրանք կարեւոր ազդանշան ուղարկեցին առ այն, որ բռնացողները չեն հաղթի»,- նշել է ՄԱԿ-ի գլխավոր քարտուղարը:
Աֆղանստանի բարձրագույն պետական պաշտոնի համար առաջադրվել էր ութ թեկնածու: Ֆավորիտներ են համարվում արտաքին գործերի նախկին ղեկավարներ Զալմայ Ռասուլը եւ Աբդուլա Աբդուլան, ինչպես նաեւ ֆինանսների նախկին նախարար Աշրաֆ Գանի Ահմադզայը: Գործող նախագահ Համիդ Քարզայն ընտրություններին չի մասնակցել, քանի որ, Սահմանադրության համաձայն, իրավունք չունի իր թեկնածությունն առաջադրել երրորդ ժամկետով:
Անկախ ընտրական հանձնաժողովի տվյալներով՝ ընտրություններին մասնակցել է շուրջ յոթ միլիոն մարդ կամ ընտրողների 58 տոկոսը:
Սպասվում Է, որ ընտրությունների նախնական արդյունքները հայտնի կդառնան այս շաբաթվա ընթացքում: Վերջնական տվյալները կհրապարակվեն ապրիլի 24-ին, հաղորդել Է «Ինտերֆաքս»-ը:
