Հայ Յեղափոխական Դաշնակցություն կուսակցությունը երբեք անձերի խնդիր չի դրել, այդ է պատճառը, որ վարչապետի թեկնածուի հարցի քննարկման նպատակով ՀՀ Նախագահի հրավիրված խորհրդակցությանը կուսակցության ներկայացուցիչները որեւէ մեկի անունը չեն տվել: Այս մասին ասաց Ազգային ժողովում ՀՅԴ խմբակցության քարտուղար Աղվան Վարդանյանը՝ անդրադառնալով հարցին, թե ով կլինի վարչապետի պաշտոնի՝ բոլորի համար նախընտրելի թեկնածուն: «Մենք դրել ենք երկրում համակարգային փոփոխությունների անհրաժեշտության հարց, նոր որակի պետության հիմքերի ստեղծման հարց: «Քառյակը» ինքնին նաև այդ նպատակն ունի և միջոց է այս նպատակին հասնելու համար»,- ասաց Վարդանյանը:
Նա նշեց, որ ամբողջ ընթացքում իրենք ասել են, որ իրենց համար անձերի խնդիր գոյություն չունի: «Մեզ համար գոյություն ունի մեր պատկերացումների համապատասխան երկրում փոփոխություններ անելու հարցը»,- ասաց Վարդանյանը: Նախագահի հետ հանդիպման ընթացքում ՀՅԴ ներկայացուցիչները նշել են, որ իրենց կողմից ներկայացված 7 կետերը, որոնք ավելի մանրամասնված են, այն փաթեթն է, որը երկրում կբերի համակարգային փոփոխությունների: Ազգային ժողովի նախագահ Հովիկ Աբրահամյանը կլինի հաջորդ վարչապետը, թե մեկ ուրիշը, ՀՅ Դաշնակցության համար էական չէ, քանի որ նրանք անձի խնդիր չեն դնում: Աղվան Վարդանյանը նշեց, որ եթե լինի պատկերացում, որ իրենց առաջարկած փոփոխությունները պետք է իրականացվեն, իրենք կողջունեն:
Աղվան Վարդանյանը նշեց, որ իրենք կառավարությունում կոալիցիա կազմելու հարցը չեն քննարկել և չեն պատրաստվում քննարկել: Ներկայացրել են փոփոխությունների իրենց հայեցակարգը, որն ամփոփված է 7 կետերի մեջ, և կապված նրա հետ, թե ինչ որոշում կկայացնի հանրապետության Նախագահը, իրենք կկողմնորոշվեն: Հարցին, թե չի՞ բացառվում, որ անյուամենայնիվ ՀՅԴ-ն կոալիցիա կկազմի կառավարության հետ, Աղվան Վարդանյանը նշեց, որ այս աշխարհում ոչինչ չի կարելի բացառել, սակայն ամեն ինչ կախված է նրանից, թե քաղաքական մեծամասնությունն ինչ վերաբերմունք կունենա իրենց առաջարկ ած հայեցակարգի նկատմամբ:
Ապրիլի 3-ին վարչապետի պաշտոնից հրաժարական էր ներկայացրել Տիգրան Սարգսյանը: Նույն օրը ՀՀ Նախագահ Սերժ Սարգսյանը հրամանագիր էր ստորագրել, որով ընդունել է կառավարության հրաժարականը եւ որոշել, որ կառավարության անդամները պետք է շարունակեն պարտականությունների կատարումը մինչև նոր կառավարության կազմավորումը: Սպասվում է, որ նոր վարչապետի անունը հայտնի կդառնա ապրիլի 13-ին Հանրապետական կուսակցության գործադիր մարմնի նիստում: ՀՀ Նախագահ Սերժ Սարգսյանն արդեն խորհրդակցություններ անցկացրել է ՀՅԴ-ի, ԲՀԿ-ի և ՕԵԿ-ի ներկայացուցիչների հետ:
