Թուրքիան եւ Ռուսաստանը պայմանավորվել են մեծացնել «Երկնագույն հոսք» գազատարի թողունակությունը 16 մլրդ խմ-ից մինչեւ 19 մլրդ խմ , որը նախատեսված է Սեւ ծովի հատակով ռուսաստանյան գազը Թուրքիա մատակարարելու համար: Այս մասին, ինչպես հաղորդում է թուրքական «Հաբերլեր» լրատվական կայքը, երկուշաբթի լրագրողներին հայտարարել է Թուրքիայի էներգետիկայի եւ բնական պաշարների նախարար Թաներ Յըլդըզը:
Թուրք չինովնիկները գտնում են, որ Ուկրաինայում վերջին զարգացումները ռիսկ են ստեղծել Թուրքիայի համար, քանի որ Ռուսաստանից մատակարարվող գազի 12,5 տոկոսը կատարվում էր Ուկրաինայով' արեւմտյան գազատարով: Այդ պոտենցիալ խնդիրը կանխելու միջոցառումները թուրքական կողմը քննարկում է «Գազպրոմ»-ի արտահանման հարցերով գլխավոր տնօրեն Ալեքսանդր Մեդվեդեւի հետ, ով բանակցությունների համար երկուշաբթի ժամանել է Անկարա:
Թուրքիայի համար մյուս գերակա հարցը, որը գործնականում ամբողջովին կախված է էներգետիկ ռեսուրսների ներկրումից, հանդիսանում է ձեռք բերվող գազի գինը: Թաներ Յըլդըզը հայտարարել է, որ Թուրքիան ձգտելու է մասնավոր հատվածի համար «խելամիտ գնով» գազի գնման նոր պայմանագիր կնքել Ռուսաստանի հետ:
Ամենայն հավանականությամբ, խոսքը Ռուսաստանից Սեւ ծովի հատակով «Հարավային հոսք» գազատարի մասին է, որը թուրքական կողմը ցանկանում է անցկացնել իր տարածքով ե՛ւ սեփական կարիքները հոգալու, ե՛ւ Եվրոպա փոխադրելու նպատակով:
