Ռուսական «Գազպրոմ» ընկերությունը մերժել է թուրքական կողմի դիմումը՝ տարեկան 3 միլիարդ խորանարդ մետր գազը «Երկնագույն հոսքով» մատակարարելու վերաբերյալ և հայտնել, որ գազը կմատակարարվի «Թուրքական հոսք»-ի միջոցով:
Ինչպես հաղորդում է «Արմենպրես»-ը՝ վկայակոչելով ռուսական ՏԱՍՍ գործակալությունը, այս մասին լրագրողներին հայտնել է «Գազպրոմ»-ի ղեկավար Ալեքսեյ Միլլերը:
«Դիտարկվում են տարբեր տարբերակներ: Դեռևս վերջնական որոշումներ չեն կայացվել: Սակայն պահանջվող 3 միլիարդ խորանարդ մետրից առնվազն երկուսը կմատակարարվեն «Թուրքական հոսքով»,- հայտնել է Միլլերը:
Ռուսական գազային հսկայի ղեկավարի այս հայտարարությունը վերջերս լարված ռուս-թուրքական հարաբերությունների ֆոնին պատահական չէ: Ռուսական ռազմական ինքնաթիռի՝ Թուրքիայի օդային սահմանը սխալմամբ հատելուց հետո երկու երկրների հարաբերություններն այն աստիճանի են լարվել, որ Թուրքիայի նախագահ Ռեջեփ Թայիփ Էրդողանն անգամ սպառնացել է գազ չգնել Ռուսաստանից, իսկ Աքքույու ատոմային էլեկտրակայանի կառուցումը հանձնել մեկ այլ պետության:
«Թուրքական հոսք» գազատարի շինարարության մասին որոշումը կայացվել է 2014 թվականի դեկտեմբերին՝ կապված Թուրքիայում ռուսական գազի պահանջարկի մեծացման հետ: Ներկայումս ռուսական գազը Թուրքիային մատակարարվում է ցամաքով և ծովային գազատարով՝ «Երկնագույն հոսքով»: «Գազպրոմ» ընկերության ղեկավարն ավելի վաղ հայտնել էր, որ ընկերությունը դեռևս կսահմանափակվի «Թուրքական հոսք»-ի երկու գծի շինարարությամբ:
