«Ճգնաժամ, պառակտում, չգիտեմ, որեւէ նման խնդիր չկա, Կոնգրեսի նիստերում չի եղել ու չկա: Կոնգրեսի բոլոր կառույցներն արդյունավետ աշխատում են: Չգիտեմ՝ ինչի մասին է խոսքը, որովհետեւ մի բան է ՝ մամուլով են ասում , այն էլ հակասական հայտարարություններ : Նույն կուսակցության ներսում տարբեր կարծիքներ են ասվում: Ոչ ոք նման հարց ինստիտուցիոնալ կերպով ՀԱԿ քաղխորհրդում չի ներկայացրել: Հակառակը՝ ձեւավորվել է լուրջ կոնսենսուս, շարունակում ենք մեր քննարկումներն ու անելիքները »,-Aravot.am-ի հետ զրույցում ասաց ՀԱԿ համակարգող Լեւոն Զուրաբյանը՝ անդրադառնալով ՀԱԿ-ին ճգնաժամից հանելու համար ՀԱԿ անդամ Պետրոս Մակեյանի ներկայացրած առաջարկությանը:
Անդրադառնալով ՀԱԿ-ի ճգնաժամի պատճառ լինելու իրեն ուղղված մեղադրանքներին, պարոն Զուրաբյանն ասաց.«Նման բան չի առաջարկվել, ինստիտուցիոնալ մոտեցման կողմնակից եմ, որեւէ նման հարց որեւէ կուսակցության կողմից չի դրվել: Եթե ասելիք կա, ես համարում եմ ասելիքը ձեւավորված, եթե այն կոնկրետ մեխանիզմով դրվում է Կոնգրեսի քննարկմանը»:
Պարոն Զուրաբյանին խնդրեցինք անդրադառնալ նաեւ ՀԱԿ անդամ Սասուն Միքայելյանի հայտնի հոդվածին:
«Կարծում եմ՝ Լեւոն Տեր-Պետրոսյանը, ում որ հենց ուղղված էր Սասուն Միքայելյանի նամակը, շատ սպառիչ ու դիպուկ պատասխան է տվել: Անհամեստություն կհամարեի որեւէ բան ավելացնել»,- ասաց ՀԱԿ համակարգողը:
Նա նաեւ չհամաձայնեց, թե ՀԱԿ առաջնորդը Ս. Միքայելյանի քննադատությանը մեղմ էր արձագանքել, որ ՀԱԿ-ի ներսում ստեղծված նոր լարվածության մասին կասկածներ չլինեն:
Մեր հարցին, թե Սասուն Միքայելյանի հարցադրումները՝ «մի՞թե սա է ՀԱԿ-ի վարած ճիշտ քաղաքականությունը, որի արդյունքում կտրվում է ժողովրդի վերջին հույսը, փոշիացվում է մեր երկրում աոաջինը համարվող ընդդիմադիր ուժը' ջարդելով ընդդիմության մեջքը», արդյոք նաեւ ՀԱԿ ընտրազանգվածի հարցադրումները չե՞ն, պարոն Զուրաբյանն ասաց. «Չեմ կարծում»:
Պարոն Զուրաբյանը անդրադարձավ նաեւ Տեր-Պետրոսյանի չառաջադրվելու որոշմանն ուղղված քննադատությանը, թե մի՞թե Տեր-Պետրոսյանն իր տարիքի մասին իմացավ միայն տարեվերջին. «Եթե ուշադիր կարդաք, միայն տարիքի մասին խոսքը չի գնում: Տարիքը կարող էր նաեւ անտեսվել որպես գործոն, եթե այլ խնդիրներ չլինեին: Իսկ դրա մասին ասված է Տեր-Պետրոսյանի հայտարարության մեջ, եթե կարծում եք պատճառաբանված չէ, նորից վերընթերցեք հայտարարությունը»:
Արփինե ՍԻՄՈՆՅԱՆ
