Վերջերս ավարտվեց «Բախտաբեր» հեռուստասերիալը, ավարտվեց բավականին արտասովոր կերպով` հեռուստադիտողների հոծ բազմության մոտ թողնելով բազմաթիվ անպատասխան հարցեր: Այս առնչությամբ ԼՈՒՐԵՐ.com-ը զրուցել է «Բախտաբեր» հեռուստասերիալի գլխավոր պրոդյուսեր Էդգար Ավագյանի հետ:
- Սերիալի առաջին եթերաշրջանի անսպասելի ավարտն ու հանգուցալուծումն անակնկալ էր հեռուստադիտողի համար: Ինչո՞ւ հենց այդպես այն ավարտվեց:
- «Բախտաբեր» հեռուստասերիալն ութ ամիս առանց դադարի ցուցադրվել է՝ ունենալով բարձր դիտողականություն և բոլոր ցուցանիշներով ապահովելով առաջատարի դիրք՝ առաջին իսկ սերիայից:
Ըստ հեռուստատեսային ոլորտը չափող միջազգային «Տելեմեդիակոնտրոլ» ընկերության ներկայացրած տվյալների՝ Հայաստանում «Բախտաբեր» հեռուստասերիալն անփոփոխ կերպով եղել է առաջին հորիզոնականում՝ բոլոր հեռուստանախագծերի վարկանիշային ցուցակում՝ ամսվա կտրվածքով: Սերիալի ցուցադրման ողջ ընթացքում միջինացված տվյալներով յուրաքանչյուր սերիան դիտել է մոտ 250 հազար մարդ, որը կազմում է տվյալ պահին հեռուստացույց դիտողների 46 տոկոսը:
Այն կրկին առաջատարի ցուցանիշներ է ունեցել թե´ ԱՄՆ-ում, թե´ Եվրոպայում, թե´ Ռուսաստանում, թե´ համացանցում:
Նման ռեյտինգային ցուցանիշներ ունենալը մեր աշխատանքային թիմի դժվարին աշխատանքի արդյունքն է, իսկ հանդիսատեսը միշտ պահանջկոտ է: Այդ պատճառով մենք փորձում ենք ամեն անգամ մի նոր, հետաքրքիր լուծում առաջարկել:
- Հեռուստադիտողի համար անակնկալ էր նաև Սոս Ջանիբեկյանի՝ «սցենարից դուրս մնալը»:
- Սոս Ջանիբեկյանի՝ սերիալից դուրս գալն ի սկզբանե պայմանավորված է եղել սյուժեով, քանի որ դերասանի զբաղվածությունը մի շարք այլ ֆիլմերում բավականին մեծ էր, իսկ դրա մասին մենք գիտեինք դեռ նախագիծը սկսելուց առաջ:
- Ինչպե՞ս որոշվեց սերիալի սյուժեի հիման վրա գեղարվեստական ֆիլմ նկարահանել:
-Սա էլ մեր խնդիրներից մեկն էր: Պահանջկոտ հանդիսատեսի համար նոր լուծումներ գտնել:
Այդպիսի մի լուծում էլ հիմա նախաձեռնել ենք:
«Բախտաբեր» հեռուստասերիալի առաջին եթերաշրջանի նկարահանումներն ավարտելուց հետո սկսեցինք նկարահանել «Բախտաբեր» գեղարվեստական ֆիլմը՝ սյուժեն համեմված մեկ տարվա իրադարձություններով:
Նկարահանումն իրականացվել է USArmenia 4K Production-ի և Accord Production-ի կողմից: Սցենարի հեղինակն է Անահիտ Մխիթարյանը, ռեժիսորը Վահե Սայանն է, ֆիլմում հանդես են գալու սերիալում նկարահանված բոլոր դերասանները:
Հաշվի առնելով մեր հանդիսատեսի հետաքրքրությունը՝ կարող եմ ասել, որ առաջին եթերաշրջանի 140-րդ սերիայի վերջին հատվածում մենք արդեն իսկ փոքրիկ հատված ցուցադրել ենք ֆիլմում ներկայացված իրադարձություններից:
- Երկրորդ եթերաշրջան կլինի՞:
- Երկրորդ եթերաշրջանի մասին դեռ շուտ է խոսել. սցենարային քննարկումների փուլի մեջ ենք, բայց մեզ նաև հետաքրքիր է հանդիսատեսի կարծիքը և պահանջը՝ երկրորդ եթերաշրջանի նկարահանման աշխատանքները սկսելուց առաջ:
- Ե՞րբ և որտե՞ղ հանդիսատեսը կարող է դիտել ֆիլմը:
- Գեղարվեստական ֆիլմի ցուցադրություն հեռուստատեսությամբ առաջիկայում նախատեսված չէ: Ֆիլմը հնարավոր է դիտել բոլոր կինոթատրոններում:
Պրեմիերան կլինի հոկտեմբերի 8-ին՝ «Հայաստան» կինոթատրոնում ժամը 20.00-ին:
Ստորև Ձեր ուշադրությանն ենք ներկայացնում «Բախտաբեր» գեղարվեստական ֆիլմի թրեյլերը:
