Թուրքական ռազմական ինքնաթիռները հատել են Իրաքի օդային տիրույթն ու ռումբ նետել երկու երկրների սահմանային հատվածում, հայտնում է Fars News գործակալությունը:
«Թուրքական կործանիչները չորեքշաբթի խախտել են Իրաքի օդային տիրույթն ու ռումբ են նետել Թուրքիայի հետ սահմանակից իրաքյան տարածքում՝ Դախուկ նահանգի Ալ-Իմադիա շրջանում»,- հայտնում են ԶԼՄ-ները:
Ականատեսների վկայությամբ՝ ավիահարվածները հասցվել են Դեյրլուկ ու Շիլաջի շրջաններում «Քրդստանի աշխատավորական» կուսակցության զինյալների դիրքերին:
Ավելի վաղ ԶԼՄ-ները հայտնել էին, որ 130 թուրք զինվորական է ուղևորվել Մոսուլ քաղաքի մերձակայք Իրաքի քրդերին մարզելու նպատակով:
Reuters-ի աղբյուրը Թուրքիայի անվտանգության ծառայությունում հայտնել էր, թե միջազգային հակաահաբեկչական կոալիցիան այդ մասին տեղյակ է եղել:
Իրաքի իշխանությունները կոչ էին արել Թուրքիային անհապաղ դուրս բերել երկրի տարածքից զինվորականներին ու ռազմական տեխնիկան:
