Արամի 72-80 շենքի խաբված բնակիչներն այսօր դարձյալ բողոքի էին դուրս եկել ֆինանսների նախարարության շենքի մոտ' հանդիպում պահանջելով նախարար Վաչե Գաբրիելյանի հետ: Սակայն ոստիկանները նախարարության դուռը բանալիով փակել էին' չթողնելով, որպեսզի դրսում սպասող կանայք գոնե միջանցքում սպասեն պաշտոնյաների պատասխանին: «Թուրք ենք, ինչ ենք, ինչի՞ եք դուռը մեր վրա փակում: Առավոտվանից ստեղ սառում ենք, բայց ոչ մի պատասխան չկա»,- ասում էին նրանք:
Խնդիրն այն է, որ թեև Արամի 72-80 հասցեի շենքի բնակիչներին կառավարությունից խոստացել են, որ Լոգիկոն բիզնես կենտրոնը նրանց բնակարանային հարցերը կլուծի' Ծիծեռնակաբերդի խճուղում բազմաբնակարան շենք կառուցելով, սակայն մարդիկ թերահավատ են: Նրանք ասում են, որ ֆինանսների նախարարության այս հայտարարությունից հետո Արամի 72-80 շենք բնակության է տեղափոխվել վերնախավը և տիրացել իրենց տներին, իսկ իրենց համար նախատեսված շենքը հայտնի չէ, թե երբ կկառուցվի:
«Հիմա իրանք գրավել են մեր շենքը, մեր քանդված տների տեղը կառուցված շենքը, իսկ մենք փողոցներում ենք: Ծիծեռնակաբերդի խճուղում կառուցվող շենքի սեփականատերն էլ պայմաններ է դնում, որոնց հետ համամիտ չենք: Պահանջում են, որ մենք իրենց գումար տանք շենքը կառուցելու համար, այսինքն'մեր տները մեզ նորից վաճառեն: Հայտնի էլ չի, թե երբ կավարտեն շենքի շինարարությունը»,- Lragir.am-ի հետ զրույցում նշեցին բնակիչները:
Նրանք եկել էին ֆինանսների նախարարություն' պահանջելու իրենց տների գումարը: «Արդեն հոգնել ենք, թող մեզ մեր տների գումարը տան, գնանք տուն ձեռք բերենք: Ութ տարի սպասելուց հետո նորից փող են ուզում մեզնից, ասում' էլի սպասեք: Մենք որտեղի՞ց համոզված լինենք, որ այդ շենքը կկառուցեն ու կտան մեզ: Ութ տարի սպասելուց հետո մեզ ցույց են տալիս արմատուրաներով կիսակառուց»,- նշում են նրանք:
Բնակիչները պահանջում են, որ Վաչե Գաբրիլյանը, եթե ոչ որպես ֆինանսների նախարար, ապա գոնե որպես իրենց բնակարանների հարցով ստեղծված միջգերատեսչական հանձնաժողովի նախագահ ընդունի և լսի իրենց: Մարդիկ ասում են, որ պետության հետ են պայմանագիր կնքել, բայց այսպես ասած ժողովրդավարության ձգտող Հայաստանի պաշտոնյաները չեն բարեհաջում հանդիպել հասարակ ժողովրդի հետ և դոռ են կողպում նրանց առաջ:
