Ռիո դե Ժանեյրոյի 31-րդ ամառային Օլիմպիական խաղերում հայ ըմբիշ Միհրան Հարությունյանի հանդեպ կայացված անարդար մրցավարական որոշումը շարունակում է քննարկումների առիթ լինել: Իրավաբան Հայկազ Մակարյանն ու քաղաքագետ Ստեփան Սաֆարյանը լրագրողների հետ զրույցում անդրադարձան այդ թեմային: Քաղաքագետ Ստեփան Սաֆարյանի խոսքով՝ ոսկե մեդալը խլեցին ոչ միայն Միհրանից, այլև ողջ հայ ազգից և ի պատասխան դրա' անհրաժեշտ է դիմել Լոզանի արբիտրաժային դատարան և պահանջել արդարության վերականգնում:
«Որպես քաղաքացի, ես կարծում եմ, վատ չէ, երբ փոքր երկիրը կարողանում է այսպիսի արդյունքներ ցուցադրել, բայց տեղի ունեցած անարդարությունը ցույց է տալիս, որ մենք կարող էինք ունենալ առնվազն 2 ոսկե մեդալ: Ես պետք է կրկնեմ մարզական մեկնաբանների խոսքը, ովքեր տեղի ունեցածը որակեցին որպես անարդարություն: Միհրան Հարությունյանից գողացան ոսկե մեդալ և դա ոչ միայն մարզիկից գողացան, այլև մեր ազգից: Մեր օլիմպիական պատվիրակությունը քայլեր չձեռնարկեց իրավիճակը փոխելու համար: Հայաստանի ազգային օլիմպիական կոմիտեն պարտավոր է բողոքարկել Միհրան Հարությունանի նկատմամբ անարադարությունը: Ես օգնեցի բոլոր այն կազմակերպիչներին, ովքեր կազմակերպեցին Միհրանի համար ստորագրահավաք»,- նշեց Ստեփան Սաֆարյանը:
Իրավաբան Հայկազ Մակարյանն անձրադարձավ Ռուսաստանի ըմբշամարտի ֆեդրացիայի նախագահ Միխայիլ Մամիաշվիլիի հայտարարությանը, որում նշվել էր, որ եթե ինքը ցանկանար, ապա Միհրանը չէր հասնի օլիմպիական խաղերին: Հայկազ Մակարյանը այս հայտարարությունը որակեց ոչ օրինական գործողություն:
«Զբաղեցնելով այդպիսի պաշտոն՝ այդպիսի հայտարարություն անել չի կարելի: Օլիմպիական կոմիտեի կանոնադրության 23-րդ հոդվածում նշվում է, որ պաշտոնյան իրավունք չունի կատարել նման հայտարարություն: Այս ամենը դեմ է խաղաղասիրական, մարդասիրական սպորտային էթիկայի նորմերին: Պետք է դիմել Լոզանի արբիտրաժային դատարան և պահանջել պաշտոնյայի հրաժարականը»,-նշեց Հայկազ Մակարյանը:
