Քիչ առաջ Կոտայքի մարզի Արգել գյուղի 26/01 ընտրատեղամասում լարված իրավիճակ ստեղծվեց:
ԼՈւՐԵՐ.com-ի տեղեկացմամբ՝ հանձնաժողովի նախագահ Յուրի Ավագյանը վստահված անձանցից մեկի՝ Լենդրուշ Արզումանյանի մոտ հայտնաբերել է ընտրողների ցուցակ:
Ըստ հանձնաժողովի նախագահի՝ ձեռագիր գրված ցուցակն ընդհանուր չէ, այլ «պլյուսներով-մինուսներով» ցուցակ է, նրանք այդ կերպ ուզում են հասկանալ, թե իրենց ընտրողներից ով է եկել և ով չի եկել ընտրության։
Նշենք, որ վստահված անձն իր մոտ եղած թղթի վրա քաղաքացիների անուն–ազգանուններ էր գրում: Մեր հարցին, թե հատկապես ում անուններն է գրում, վերջինս պատասխանել էր, թե այդ ցուցակը հետագայում համեմատելու համար է կազմում:
Ոստիկանության մայորին հանձնաժողովի նախագահն ասաց, որ վստահված անձին կասկածում է գումար բաժանելու մեջ և նրա մոտ եղած ցուցակը նախատեսված է համեմատելու համար, թե նախապես խոստացածներից ով է եկել ընտրության:
Այնուհետև, Յուրի Ավագյանը մեզ պատմեց, որ վստահված անձը ոստիկանության աշխատակցին խոստովանել է՝ ցուցակում այն մարդկանց անուններն են, ովքեր իրենց խոստացել են ընտրել իրենց, թե ինչի հաշվին՝ պարզ չէ:
Նշենք, որ մեր լրագրողին թույլ չի տրվել նկարահանում կատարել ոստիկանության հենակետում, որտեղ հանձնաժողովի անդամը ցուցմունք էր տալիս:
Ոստիկանությունն առգրավվել է Լենդրուշ Արզումանյանի ցուցակը:
16.30-ի դրությամբ ընտրությանը մասնակցել է 583 ընտրող, որից 31 քաղաքացի ունեցել է քվեախցիկում օգնության կարիք:
Լուսանկարում՝ Լենդրուշ Արզումանյան
