‘’Գործադուլը եւ դասադուլը սահմանադրորեն քաղաքացուն վերապահվածխ իրավունքներ են եւ դրա համար պետք չէ, որ Րաֆֆի Հովհաննիսյանը կամ նրա շտաբը կամ որեւէ մեկը պատասխանատվություն ստանձնի, այլ բան է, որ Րաֆֆի Հովհաննիսյանի նախընտրական շտաբը քաղաքացիական անհնազանդության կոչ հնչեցնելու որոշում չի ընդունել եւ նման հարց չի քննարկել’’ ,-այսօր զրույցում ասել է Ժառանգություն կուսակցության քարտուղար Ստյոպա Սաֆարյանը'անդրադառնալով դասադուլ հայտարարելու քաղաքացիական ակտիվիստների կոչերին, որոնք երեկ Րաֆֆի Հովհաննիսյանի հանրահավաքին հանդես եկան այդ կոչով եւ հայտարարեցին, որ ստանձնում են քաղաքացիների քվեն եւ ընտրության իրավունքը պաշտպանելու պատասխանատվությունն իրենց վրա:
Ստյոպա Սաֆարյանի խոսքով, վերը նշվածը չի նշանակում, թե Րաֆֆի Հովհաննիսյանի նախընտրական շտաբը կարող է արգելել որեւէ մեկին' իրացնելու իր սահմանադրական իրավունքը կամ այլոց կոչ անելու' իրացնելու այդ իրավունքը: ‘’ Այնքանով մենք պատասխանատվություն կարող ենք ունենալ դրա համար, որքանով, որ այդ միջոցառումները սահմանադրական իրավունքների շրջանակներում են եւ բռնություն չեն պարունակում: Դասադուլները բռնություն չեն պարունակում, հետեւաբար Րաֆֆի Հովհաննիսյանի նախընտրական շտաբը որքան էլ աղերսներ չունի այդ որոշման հետ, որը կայացվել է մի շարք քաղաքացիների կողմից իբրեւ իրենց բողոքի ձեւ, այնուամենայնիվ, դրա հետ կապված խնդիր չունի’’,-հավելեց Ստյոպա Սաֆարյանը:
Ինչ վերաբերվում է ակտիվիստների այն հայտարարությանը, որ ստանձնում են ժողովրդի ընտրական իրավունքը պաշտպանելու պատասխանատվությունը, Ստյոպա Սաֆարյանն ասաց.’’Ես չգիտեմ, թե իրենք ինչ ի նկատի ունեն: Ժողովուրդն իր քվեն տվել է եւ Ժառանգության եւ այլ կուսակցությունների անդամներն ու վստահված անձինք փորձել են դա պահպանել եւ դա փորձում էր անել ընտրատարածքային հանձնաժողովներում բողոքներ ներկայացնելով: Ճիշտն ասած, ես չգիտեմ, թեքաղաքացիական այդ խումբն ինչ է հասկանում ժողովրդի քվեն պաշտպանել ասելով, որովհետեւ քվեն արդեն նետված է, քվեն հաշվարկված է եւ կան անճիշտություններ: Եթե իրենք գնալու են եւ բոլոր տեղամասերի հետ կապված պահանջելու են քվեների վերահաշվարկ, ապա ես միայն ու միայն կողջունեմ, այլ պարագայում ես չեմ հասկանում, թե ինչ ի նկատի ուեն քվեն պաշտպանելու տալ’’:
Ստյոպա Սաֆարյանը հավելեց, որ քաղաքացիական ակտիվիստներն իրենց հոժար կամքով եկել եւ մաս են կազմել հաղթանակած ժողովրդի եւ ոչ լիդերության ու առաջնորդության խնդիր չունեն.’’Մեր նման իրենք ժողովրդի ծառաներ են եւ պիտի սպասարկեն ժողովրդին եւ ոչ ավելին’’:
