Ինչպես արդեն տեղեկացրել ենք, Հրայր Թովմասյանի փոխարեն պատգամավոր դարձավ Տաճատ Վարդապետյանը, ով հինգերորդ գումարման խորհրդարանում ևս պատգամավոր էր: Նա այսօր առաջին անգամ էր մասնակցում խորհրդարանի նիստին և ներկայացրեց իր տեսլականը: 

Լրագրողների հետ զրույցում Տաճատ Վարդապետյանը նշեց, որ 2007թ.-ից խորհրդարանում է եղել և նպատակադրված է ակտիվորեն ձեռնամուխ լինել օրենսդիր մարմնի աշխատանքներին. «Նպատակս ակտիվ գործունեությունս է, որի մեջ իր ուրույն տեղն է ունենալու իմ ծննդսվայրին, ջավախահայությանը վերաբերող հարցերը»,- ասաց նա:

Անդրադառնալով հարցին, թե ՀՀԿ-ականներն ասում են՝ Սերժ Սարգսյանն անփոխարինելի է, ինքն է՞լ է այդպես կարծում, Վարդապետյանն ասաց․

«Ես նրան գնահատում եմ շատ բարձր, ինչ խոսք, առաջիկայում, վարչապետի ընտրության հարցը դեռ քննարկվելու է Հանրապետական կուսակցությունում: Ինչ վերաբերում է Սերժ Սարգսյան գործչին, ինձ համար նա անթերի քաղաքական գործիչ է, և նրան՝ որպես երկրի ղեկավար, շատ բարձր եմ գնահատում»,- ասաց նա։

Դիտարկմանը՝ Սերժ Սարգսյանի կառավաման օրոք բազմաթիվ թերություններ են եղել, և մինչև հիմա այս երկիրը  փորձում է դրանց տակից դուրս գալ, Վարդապետյանը չհամաձայնեց, որ դրանք ուղղակի կապ ունեն Սերժ Սարգսյանի հետ․ «Ես համաձայն չեմ, որովհետև գիտե՞ք ինչ կա, ամենալայն, մեծ ռեսուրսներ ունեցող երկրներում էլ թերություններ լինում են, այդ թերությունները ուղղակիորեն ես չեմ կապում նրա կառավարման որակի հետ։ Իսկ ինչ վերաբերում է խնդիրներին, նա այն բարեխիղճ ղեկավարն է, որ մշտապես ինքն է խոսում թերությունների մասին և անում ամեն ինչ, որպեսզի այն շտկվի և շտկվում է»,- նկատեց Վարդապետյանը։