Երևանում նոր 250 Մվտ հզորությամբ էլեկտրակայանի կառուցումը Իտալական «ՌԵՆԿՈ» ընկերության ամենամեծ և ռազմավարական նախագիծն է Հայաստանում:

Շինարարական փուլի մեկնարկին լրագրողների հետ զրույցում այս մասին ասաց «ՌԵՆԿՈ» ընկերության հայաստանյան գրասենյակի տնօրեն Սիմոնե Ջովանինին։

«Մենք հպարտանում ենք Հայաստանում մեր գործունեությամբ։ Սա մեր ամենամեծ ներդրումն է լինելու Հայաստանում, չնայած, որ արդեն 20 տարի գործունեություն ենք ծավալում այստեղ», - ասաց Ջովանինին և հավելեց, որ նախագծի ուղղությամբ առաջին աշխատանքները սկսել են դեռևս 2016 թվականին։

Նրա խոսքով՝ այս նախագիծը վերջինը չի լինելու, և իրենք ծրագրում են ավելի մեծ ծրագրեր իրականացնել Հայաստանում առաջիկա 30-40 տարիներին:

Երևանում նոր 250 Մվտ հզորությամբ էլեկտրակայանի կառուցման շինարարական փուլի մեկնարկը տալու հանդիսավոր արարողությանը մասնակցել է ՀՀ վարչապետ Նիկոլ Փաշինյանը։