Արտակարգ դրության հաստատումից քիչ անց, տարածվեց պաշտոնական տեղեկատվություն, որ Երևան քաղաքում գործող բժշկական հաստատությունների աշխատակիցները կարող են երթևեկել անվճար՝ նրանց հատկացվել են տրանսպորտային միջոցներ: Մինչդեռ պարզվում է, որ ոչ բոլորն են կարող օգտվել այդ ծառայությունից: Այս մասին ԼՈՒՐԵՐ.com-ի թղթակցի հետ զրույցում ասաց Երևանի խոշոր բուժհաստատություներից մեկի աշխատակիցը: «Եթե ինչ-որ բան արվում է, ապա միայն կորոնավիրուսի հետ աշխատող մարդկանց համար է արվում: Անձամբ ես ամեն օր տաքսիով եմ գնում աշխատանքի, հետո՝ տուն: Դե հիմա չի կարելի, որ մեքենայում երկու հոգուց ավելի մարդ լինի, գոնե ծախսը կկիսեինք»,-ասաց մեր զրուցակիցը: Նա նշեց, որ տրանսպորտի խնդրին վերաբերող հարցը մի քանի անգամ բարձրացրել են տնօրինությունում, սակայն հստակ պատասխան չեն ստացել.«Մեր տնօրենի հետ խոսել ենք, ասում ա՝ դեռ պարզ չի՝ հարցը ներկայացրել են, բայց պատասխան չեն ստացել: Նման դեպքում՝ դժվար է ասել, թե ինչ է կատարվում իրականում: Նաև նշում է, որ, եթե տրանսպորտ հատկացնեն, ապա միայն Երևանի բնակիչների համար: Օրինակ ես մարզից եմ աշխատանքի գալիս, ի՞նչ է մարդ չեմ»: Մեր զրուցակիցը նաև ասաց, որ աշխատանքի գնալու համար ամեն օր ծախսում է 3000-4000 դրամ. «Ստացվում է այնպես, որ վնասով եմ աշխատում: Այլ բուժհաստատություների աշխատակիցներին էլ ենք հարցնում, պարզվում է նրանք ևս նույն վիճակում են: Արտոնություն ունեն այն հաստատություները, որոնք կորոնավիրուսով են զբաղվում»: Իրավիճակի վերաբերյալ զրուցեցինք նաև Մուրացան հիվանդանոցի տնօրեն Բագրատ Բավեյանի հետ: Վերջինս մեզ հայտնեց, որ քաղաքապետարանն իրենց անվճար տրանսպորտ չի տրամադրել, այլ՝ բժշկական համալսարանը. «Մեկ ավտոբուս է, որն աշխատում է մեկ հիմնական ուղղությամբ՝ աշխատողներին բերում աշխատանքի, իսկ հերթափոխն ավարտածներին՝ տանում տուն: Իհարկե, բոլորին չէ, որ կարողանում է սպասարկել, քանի որ մարզերից եկող աշխատակիցներ ևս ունենք»: Անդրադառնալով մեր հարցին, թե, այնուամենայնիվ, ինչու իրենց բուժհաստատությանը քաղաքապետարանը չի տրամադրել անվճար տրանսպորտ, Բավեյանը պատասխանեց. «Մեր հիվանդանոցը քաղաքապետարանի ենթակայության տակ չէ, գուցե դրանով է պայմանավորված, որ չեն հատկացրել: Հնարավոր է, միայն իրենց ենթակայության տակ գործող հաստատություներին են տրամադրում»: