«Հայաստանում գրեթե բոլորի համար ակնհայտ է, որ Նիկոլ Փաշինյանի իշխանությանը հաշված շաբաթներ են մնացել, եթե ոչ օրեր։ Ըստ այդմ, բոլոր այն մարդիկ, որոնք միշտ փորձում են հարմար դիրք ընդունել գալիք իշխանությունների հետ համագործակցելու համար, կանխավ սկսում են իրենց դիրքորոշումները սրբագրել։ Ինձ թվում է Արմեն Դարբինյանը հենց դրանով է զբաղված, փորձում է երաշխավորել իր ապագա բարեկեցությունը՝ քննադատելով ներկայիս իշխանություններին և նախապատրաստվելով նույն ստոր երեսպաշտությամբ գալիք իշխանություններին գովերգել»,- ԼՈՒՐԵՐ․com-ի հետ զրույցում «Ադեկվադ» կուսակցության ղեկավար Արթուր Դանիելյանն այսպես մեկնաբանեց մշտապես իշխանությանը գովերգող նախկին վարչապետ Արմեն Դարբինյանի գրառումը, որտեղ վերջինս քննադատում է իշխանությանը։ Անդրադառնալով Արմեն Դարբինյանի նկատմամբ իր վերաբերմունքին՝ Դանիելյանը նշեց, որ իր քննադատությունը նրա նկատմամբ մեկ դրվագով է եղել․ «Այնպես չէ, որ ես մշտապես քննադատել եմ Արմեն Դարբինյանին․ եղել է մի դրվագ, երբ նա ելույթ է ունեցել և պնդել է, որ ի թիվս Նիկոլ Փաշինյանի կառավարության բազմաթիվ հաջողությունների, գլխավորը գուցե կայանում է նրանում, որ նա կազմաքանդել է տնտեսության կլանային համակարգը։ Ըստ այդմ՝ ես և իմ ընկերները որոշեցինք պարոն Դարբինյանից ճշտել՝ արդյոք նա Սամվել Ալեքսանյանին պատկանող «Ալեքս Գրուպ» ընկերության գոյությունը համարո՞ւմ է կլանային տնտեսության օրինակ, թե՞ ոչ։ Ընդ որում դա ընդամենը մեկ օրինակ է, բայց նմանատիպ բազմաթիվ կոնցեռներ կան Հայաստանում։ Նշեմ, որ ես դեմ չեմ այդ կոնցեռների գոյությանը, բայց ինձ հետաքրքիր էր նրա կարծիքը՝ արդյոք համարո՞ւմ էր այդ օլիգարխների գոյությունը կլանային տնտեսության գոյության ապացույց»,- ասաց նա։ Դանիելյանը նշեց նաև, որ դրանով ոչ թե Դարբինյանին է ցանկացել քննադատել, այլ անբարոյական երեսպաշտությունը, որը Հայաստանում բոլոր ռեկորդները գերազանցել է և փաստորեն Դարբինյանը ևս մեկ ցցուն օրինակն է երեսպաշտության, որը քայքայում է մեր պետությունն ու հասարակությունը։ Հիշեցնենք, որ Արմեն Դարբինյանը, թվիթերյան իր էջում դիմելով Նիկոլ Փաշինյանին, գրել էր․ «Ծաղրածու Հայկի յուրաքանչյուր օր Երևանի քաղաքապետի պաշտոնում՝ անարգանք է Երևանցու և ՀՀ քաղաքացու նկատմամբ: Վարչապետ Փաշինյան, բավական է: Զվարճանալու և իշխանությունից հաճույք ստանալու ողջ ռեսուրսը արդեն սպառել եք: Կամ լրջացե՛ք, կամ պատմությունը Ձեզ չի ների»: Մեկ այլ գրառմամբ էլ Դարբինյանը նշել է, որ պաշտպանել է հեղափոխությունը, բայց ոչ անբարտավանությունը ու սևերի ու սպիտակների բաժանումը․ «Այո՛, ես պաշտպանել եմ հեղափոխությունը: Բայց ո՛չ թայֆայական կառավարումը, ո՛չ անբարտավանությունը՝ մասնագիտական հմտությունների փոխարեն, ո՛չ սևերի ու սպիտակների բաժանումը, ո՛չ ինքնահավանությունը ու ընտանեկան ֆոնդերը: Կամ վերադարձեք հեղափոխության արժեքներին, կամ հեռացեք»:
