Քնի պակասը կարող է ազդել ոչ միայն մարդու առողջության, այլ նաև նրա արտաքին տեսքի վրա։ Ինչպես պնդում է Ավստրալիայի Սիդնեյ քաղաքից քնաբան Օլիվիա Արեցոլոն, քնի պակասը հանգեցնում է աչքերի տակ պարկերի ձևավորման, մաշկի հետ կապված խնդիրների առաջացման և անգամ ծերացման գործընթացի արագացման, հաղորդում է The Daily Mail պարբերականը։

Արեցոլոյի խոսքով՝ քնի պակասի առաջին նախանշանները կապտուկներն ու աչքերի տակ պարկերն են, որոնք առաջանում են, երբ քնի պակասի հետևանքով չորացած մաշկը պահում է ջուրը խոնավեցում ապահովելու համար։

«Չնայած որոշ չափով այդ ախտանշանները կարող են փոխանցվել ժառանգաբար՝ ութ ժամից պակաս տևողությամբ քունն ունակ է խորացնել խնդիրը», – ասել է փորձագետը։ Քնի պակասի հետևանքով նաև մաշկը չի արտադրում բավարար քանակությամբ կոլագեն, որն անհրաժեշտ է կնճիռների կանխարգելման համար։ Հենց այդ պատճառով ոչ լիարժեք քունը հանգեցնում է վաղաժամ ծերացման և մաշկի վիճակի վատթարացման։

Ըստ հետազոտությունների՝ գիշերը 5 ժամից պակաս քնող մարդկանց մոտ մաշկի ռեգեներացիան կրճատվում է 30 տոկոսով։ «Արդյունքում մաշկը ստանում է անկենդան տեսք»,-ասել է Արեցոլոն։ Գիտնականները նաև պարզել են, որ պարբերաբար քնի պակասով տառապող մարդիկ հաճախ դժգոհ են իրենց տեսքից։

«Հենց կոլագենն է ազդում ձեր մաշկի առաձգականության կամ թուլացման վրա, – պնդում է քնաբանը։ – Հետազոտություններն ապացուցում են, որ 70 տոկոս կոլագենը սինթեզվում է խորը քնի ժամանակ»։

Բացի այդ, ոչ որակյալ քնի պատճառով օրգանիզմն արտադրում է սթրեսի հորմոն՝ կորտիզոլ, որը հանգեցնում է ջրազրկման, ինչի հետևանքով մաշկը առնում է չոր։ Դեռ ավելին, այդպիսի քնից հետո թուլանում է մարդու իմունային համակարգն ու առաջանում է ակնե։ Քնաբանը խորհուրդ է տալիս օրական քնել 7-9 ժամ և խմել շատ ջուր, որպեսզի օրգանիզմը չջրազրկվի։

med.news.am