Այսօր պատերազմ է, Հայաստանը, Սփյուռքը մեկ մարդու պես միասնական են: Բոլորի նպատակը հաղթելն է: Այս մասին մեկուսարանից դուրս գալուց հետո լրագրողների հետ ճեպազրույցում ասաց ԲՀԿ առաջնորդ Գագիկ Ծառուկյանը:
«Ամեն մեկն իր մասով պետք է միասնական լինի, որ մեր բոլորի նպատակն իրականանա: Ես իմ հերթին Արցախի համար միշտ արել եմ, անում եմ, անելու եմ», - ասաց նա՝ հավելելով, որ անգամ մեկուսարանից զբաղվել է արցախցիներին տեղավորելու, նյութական աջակցություն կազմակերպելու հարցերով:
Գագիկ Ծառուկյանը նշեց, որ Արցախին օգնելու համար կապի մեջ է եղել Արցախի նախագահի հետ:
«Դա շարունակական է լինելու, մարդը պետք է ձեռագիր, անուն թողնի: Այսօր բոլորս մի ազգ ենք: Այս պահին բոլորս մի մարդու պես միասնական պետք է լինենք: Այսօր հիմնական խնդիրը պետք է լինի վիճակից դուրս գալը: Բոլորն իրենց հնարավորությունը պետք է օգտագործեն», - ասաց նա՝ նշելով, որ պետք է մի կողմ դնել բոլոր քաղաքական տարաձայնությունները:
ԲՀԿ նախագահը նաև հանձն առավ կազմակերպել կամավորների՝ առաջնագիծ ուղարկելու գործընթացը:
Վերջում Գագիկ Ծառուկյանը նշեց, որ չի կիսում Արցախի հարցով օպերատիվ շտաբ ստեղծելու գաղափարը, քանի որ պատասխանատվություն պետք է կիսեն բոլորը:
