eMedia.am, 07.05.2013 | Մայիսի 8–ին պետական բյուջեն կզրկվի 112 հազար եվրոյից։ Գումարը կհատկացվի 19 անձանց (Եհովայի վկաների), ովքեր դիմել էին Եվրոպական դատարան։ Դիմումատուներից յուրաքանչյուրը կստանա 6 հազար եվրո, որոնցից 10 հազար եվրոն դատարանի ծախսերն են: Եհովայի վկաներն ուղղակի չեն ցանկանում ծառայել բանակում։ Չեն ցանկանում անել մի բան, որը ՀՀ բնակչության արական սեռի բոլոր ներկայացուցիչների պարտքն է։ Չեն ցանկանում ծառայել, որովհետև դա դեմ է իրենց կրոնական համոզմունքներին։ Մեկ անգամ արդեն գրել եմ, որ եթե ես ստիպված եմ հարգել որևէ կրոն դավանողի՝ բանակում չծառայելու իրավունքը, ապա նա պարտավոր է հարգել իմ՝ պաշտպանված լինելու իրավունքը։ Սակայն, պետությունը, նման վճիռներից խուսափելու համար Ազգային ժողով է ներկայացրել «Այլընտրանքային զինվորական ծառայության մասին» վիճահարույց օրենքի նախագիծը։ Ակնհայտ է, որ պետական շատ այրեր, իրենք էլ կողմ չեն օրենքի ընդունմանը և ստիպված են գնում այդ քայլին, քանի որ պետբյուջեից նման գումարներ այդ անձանց վճարելը, ևս անընդունելի է։ Նշենք նաև, որ օրենքը կար և գործում էր, այսինքն տվյալ կրոնական կազմակերպությունների ներկայացուցիչները մինչ օրս էլ հրաժարվելով բանակում ծառայելուց կարող էին դիմել այլընտրանքային ծառայության համար, բայց նրանցից ոչ մեկը դա չի արել։ Մինչ օրս այլընտրանքային զինվորական ծառայություն անցնելու դիմում որևէ եհովայի վկայի կողմից չի ներկայացվել։ Նոր օրինագծով, այլընտրանքային զինվորական ծառայությունն ավելի է թեթևացվում՝ կրճատվում է ծառայության ժամկետը, բարելավում վայրերը և այլն։ Խիստ կասկածում եմ, սակայն, որ նրանցից որևէ մեկը կդիմի նորացված օրենքով ծառայելու համար։ Չէ՞ որ ավելի հեշտ է հրաժարվել ծառայությունից, դառնալ «զոհ», դիմել միջազգային կազմակերպություններին և արտերկրից գումարներ «շահել» պետության հիմքերը խարխլող գործունեության համար։ Եթե խոսում ենք հավասարության մասին, ուղղակի անհասկանալի է դառնում, թե ինչպես կարող են մի ամբողջ պետության ու բնակչության 99%–ի շահերն ու հավասարությունը ստորադասվել 1 աղանդի շահերին ու համոզմունքներին։ Անհավասարություն ծնող հավասարություն...