ԳԱԼԱ. Այսօր Գյումրիում տեղի է ունեցել վագոնային եւ լոկոմոտիվային դեպոների բացման հանդիսավոր արարողությունը, որին մասնակցել են ՀՀ վարչապետը, էկոնոմիկայի նախարարը, «Ռուսական երկաթուղիներ» ընկերության նախագահ Վլադիմիր Յակունինը եւ այլ ներկայացուցիչներ: Հյուրերն այցելել են լոկոմոտիվային դեպո՝ նոր պայմաններին ծանոթնալու նպատակով: Ներկայացվել է, որ վերակառուցման հիմնական աշխատանքները մեկնարկել են 2010 թվականին եւ այդ նպատակով ծախսվել է 93,5 միլիոն ռուբլի: Ելույթ է ունեցել նաեւ ՀՀ վարչապետ Տիգրան Սարգսյանը, ով նշել է, թե արդեն 5 տարի է, ինչ հայկական երկաթուղին հավատարմագրային կառավարման է հանձնված ռուսական կողմին, ուստի կարելի է փաստել, որ հսկայական ներդրումներ են արվել: Մեր լրագրողը հարց է ուղղել վարչապետ Տիգրան Սարգսյանին, թե իր կարծիքով' նորմալ կարելի է՞ համարել այն, որ հայկական ռազմավարական նշանակություն ունեցող գրեթե բոլոր ենթակառուցվածքներն այժմ տնօրինվում են այլ երկրների կողմից: Այս հարցին նա կարճ է պատասխանել: Իր երկրորդ ելույթի ժամանակ Տիգրան Սարգսյանը կրկին անդրադարձել է մեր լրագրողի հարցադրմանը:
