Lragir.am. Հունիսի 16-ին Մարզահամերգային համալիրում համերգով է հանդես գալու ռուսական հանրահայտ ДДТ ռոք խումբը: Իսկ այսօր մամուլի ասուլիս է տվել խմբի հիմնադիր եւ մենակատար Յուրի Շեւչուկը:
Երաժիշտը նշել է, որ Հայաստան կենդանի ծրագիր են բերել, նվագելու են տաբեր երաժշտություն՝ հեղինակային, ջազ, ռոքնռոլ, հին ու նոր երգեր տարբեր ալբոմներից, «երգելու ենք այնքան, որքան ուժներս բավականեցնի»,- ասել է հանրահայտ երաժիշտը:
Նա նշել է, որ նախկինում համերգներով են հանդես եկել նախկին խորհրդային տարբեր երկրներում՝ Ուկրաինայում, Վրաստանում, միշտ ցանկացել են լինել նաեւ Հայաստանում, որն ունի հզոր մշակույթ, ավանդույթներ: «Այդ ամենը մեզ շատ հետաքրքիր է»,- ասել է Շեւչուկը:
Երաժիշտը բացատրել է նաեւ, թե ինչու են հանդես գալիս սոլային, այլ ոչ թե կամերային համերգով: Շեւչուկը նշել է, որ կամերային համերգ կազմակերպելու համար մոտ մեկ տասնյակ բեռնատար սարքավորումներ, հսկայական տարածք ու միջոցներ անհրաժեշտ կլինեն: Այդուհանդերձ, նրա խոսքով, եթե համապատասխան հովանավոր գտնվի, ինքը պատրաստ է նաեւ կամերային ծրագրով հանդես գալ:
Յուրի Շեւչուկն իր տպավորություններն է կիսել նաեւ Երեւանի մասին: Երեկ նա զբոսնել է քաղաքի կենտրոնով, Հանրապետության հրապարակով, շատ տպավորված է գիշերային Երեւանով, շենքերի լուսավորությամբ: Նրա խոսքով, Երեւանում ինչ-որ փարիզյան ոգի կա:
ДДТ-ի հիմնադրի խոսքով, խմբի գործունեության ընթացքում ինքը աշխատել է բազմաթիվ հայերի հետ: Երկար տարիներ խմբում նվագել է Արթուր Հովհաննիսյանը, իրենց հետ աշխատել է նաեւ Արթուրի եղբայրը՝ Վազգենը: Շեւչուկը ջերմ հարաբերություններ ունի ազգությամբ հայ Ստաս Նամինի հետ, նրա հետ համատեղ համերգ են կազմակերպել: Նամինի հրավերով Շեւչուկն ու խումբը Երուսաղեմում այցելել են հայկական թաղամաս, հայ հոգեւորականների հետ զրուցել հայկական մշակույթի, հայոց ցեղասպանության մասին:
Շեւչուկին լրագրողները հարց ուղղեցին մի քանի տարի առաջ նրա արած հայտարարության մասին, որտեղ նա նշել է, որ Հայաստան համերգով չի գա, քանի որ երիտասարդություն չկա երկրում: Երաժիշտը պատմել է, որ 2003 թվականին, երբ Վրաստանում էր, ցանկանում էր համերգ տալ նաեւ Հայաստանում, սակայն իրեն ասեցին, որ այնտեղ երիտասարդություն չի մնացել, բոլորը մեկնել են արտասահման գումար վաստակելու: «Հավանաբար կատակել էին»,- ասել է Շեւչուկը:
Չնայած ասուլիսի ձեւաչափը չէր նախատեսում քաղաքական հարցեր, սակայն թեմայից խուսափել չստացվեց: Շեւչուկի խոսքով, ցանկացած մարդ՝ լինի երաժիշտ, հողագործ, արհեստավոր, իր երկրի քաղաքացին է եւ իրավունք ունի իր կարծիքն ունենալ, հաշիվ պահանջել, թե ուր են տանում երկիրը քաղաքական գործիչները: «Սակայն ես քաղաքական գործիչ չեմ, որովհետեւ դա այլ բան է՝ հոդվածներ, խիստ կարգապահություն: Քաղաքականությամբ պետք է հետաքրքրվել, սակայն դրանով քչերը կարող են զբաղվել»,- նշել է նա:
Շեւչուկն ասել է, որ բոլոր երկրներում քաղաքական գործիչներին պետք են լսող, հարմարվող հասարակություններ, որ կարողանան հեշտությամբ ղեկավարել մարդկանց: Եթե հասարակությունը պահանջող լինի, քաղաքական գործիչները ստիպված են լինելու բացատրել, համոզել իրենց տեսակետները, որ ճիշտ ուղղությամբ են տանում երկիրը, իսկ դա արդեն հեմորոյ է, նրանց համար ավելի գերադասելի է հրամաններ արձակելը: Ցանկացած հասարակություն, քաղաքակրթություն պայքարով է ստացել իր քաղաքացիական իրավունքները, եւ դա տեղի է ունենում ինչպես Ռուսաստանում, այնպես էլ Հայաստանում:
