Տավուշի մարզի Բերդի շրջանի մի խումբ բնակիչներ «Փրկեք մեզ» խնդրանքով նամակ էին ուղարկել ASEKOSE.am-ին' բողոքելով ու պահանջելով փրկել իրենց «մարդասպան», «հանցագործ», Բերդի բժշկական կենտրոնի գլխավոր բժիշկ Արամ Հարությունյանի ճիրաններից:
Նամակում նշված է, որ բնակիչները նրա հանցանքների մասին բազմիցս տեղեկացրել են իշխանություններին, պատասխանատու մարմիններին, սկսել են դատական գործընթացներ, սակայն մարդասպանը անպատիժ ու հանգիստ խղճով դեռ զբաղեցնում է իր պաշտոնը' հովանավորվելով իր հանցակից վերնախավի կողմից: Բնակիչները հանդես են գալիս փաստերով ու ապացույցներով, որոնք դատարանները, ըստ նրանց, կոծկում են Արամ Հարությունյանի կաշառքների շնորհիվ:
«Դեռևս Արցախյան պատերազմի տարիներին Արամ Հարությունյանը անպատժելիորեն յուրացրել է սահմանամերձ բնակավայրերին ու հայրենիքի պաշտպաններին ուղարկվող օգնությունները: Պատերազմի տարիներին նա վիրավորների մեծ մասին անդամալույծ է դարձրել' անհարկի կտրելով նրանց վնասված ձեռքերն ու ոտքերը, քանի որ դա ավելի հեշտ ու էժան էր, քան վերջույթը փրկելու համար նախատեսվող բուժումը:
Այս' գրեթե 30 տարիների ընթացքում Հարությունյանը չի իրականացրել մի վիրահատություն, որ չանցնի առանց բարդությունների ու հավելյալ վիրահատության անհրաժեշտության: Տավուշի մարզի քաղաքացիները ունեն փաստեր, թե ինչպես է նա հրամայում իր աշխատողներին կեղծել անալիզների արդյունքները և ստեղծել անհրաժեշտ վիրահատության պատրանք' անհարկի հեռացնելով իրեն դիմած հիվանդների 12-մատնյա աղիքի որդանման հավելվածները' «կույր աղիքները», չամուսնացած աղջնակների առողջ ձվարաններից մեկը: Բնակիչները տարիներ շարունակ աղաղակում են, որ նա իր հիվանդների օրգանները գողանում է:
Հիվանդանոցի ներսում ունի դեղատուն, որտեղ դեղերը առնվազն 5 անգամ թանկ են երկրի մնացած բոլոր դեղատներից (ՀԴՄ կտրոններն առկա են' որպես ապացույց): Սակայն հաշվեհարդար է սպառնում այն հիվանդին, ում հարազատները կփորձեն խուսանավել և դեղերը գնել քաղաքի այլ դեղատնից:
Բերդի տարածաշրջանի շտապօգնությունը վեր է ածվել Արամ Հարությունյանի գերշահութաբեր բիզնեսի: Շտապօգնության երեք մեքենաներից յուրաքանչյուրն ունի իր արժեքը' «Ուազը»' 20 հազար դրամ, «Գազելը»'50 հազար, «Ֆորդը»' 100-150 հազար: Իսկ անհետաձգելի համարվող դեպքերում կանչը մնում է անտեսված, քանի որ հիվանդանոցը ստիպված կլինի պետպատվերով բուժել»,- գրված է նամակում:
Բնակիչները նաև տեղեկացնում են, որ Նավուր գյուղից 14-ամյա Մարինե Մադոյանի անալիզները կեղծելով' նրան «կույրաղիքի» վիրահատության ենթարկեցին, երկրորդ անգամ անհարկի հեռացրին ձվարանը, առաջացած բարդությանը հետևեց երրորդ վիրահատությունը: Երեխան մահացավ, իսկ հետո պարզվեց, որ նրա կույրաղիքը հանված չէ, Հարությունյանն ուղղակի կտրել ու կարել էր' գումարները գռփելով:
Ծննդկան Կարինե Աթոյանին պտուղն արգանդում սպանեցին' նրան սխալ դեղեր ներարկելով, ինչը հաստատված է դատաբժշկությամբ:
ASEKOSE.am-ի թղթակիցը նամակում նշված աղմկահարույց դեպքերի հետքերով կապ հաստատեց մահացածների հարազատների հետ:
Կարինեի մայրը' Սվետա Աթոյանը, մեզ հետ զրույցում անդրադառնալով նամակին' ասաց, որ ինքը նամակ չի ուղարկել, իսկ ինչ վերաբերում է դեպքին' պատասխանեց.
«Խնդիրներ եղել են և դրանք ինքս եմ լուծելու: Երկար տարիներ է' պայքարում եմ և ոչ ոք իմ կողքին չի կանգնել: Պայքարելու եմ նրա համար, որ աղջկաս մահվան հետ կապված անհերքելի հանգամանքները բացահայտվեն: Արյան մեջ բիցիլին է հայտնաբերվել, ով և ինչ իրավունքով է արել' անհայտ է: Իսկ հիմա իմ երեխային սպանած և անզգայացնող ներարկած Գագիկ Լևոնի Մելիքյանը, ով համաներումով ազատ է արձակվել' ցանակնում է վերադառնալ աշխատանքի, ինչն անթույլատրելի է»:
Ինչ վերաբերում է Նավուր գյուղից 14-ամյա Մարինե Մադոյանի անալիզները կեղծելուն և նրան «կույրաղիքի» վիրահատության ենթարկելուն, ինչպես նաև անհարկի ձվարանը հեռացնելուն, ապա մեզ հետ զրույցում աղջկա հայրը' Կոլյա Մարդանյանը հաստատեց այս ամենը՝ նշելով, որ դեպքը տեղի է ունեցել 2003թ.-ին և մինչ այսօր իր երեխայի մահվան պատճառը հայտնի չէ, աղջիկը փաստաթղթերով դեռ ողջ է»:
Սոսի մայրն էլ անդրադառնալով նամակին' ասաց «Բա էտ բնակիչները որ բողոքել են, ինչո՞ւ բոլոր դեպքերը չեն ներկայացնում: Ճիշտ է, ես նամակից տեղյակ չեմ, բայց ամբողջ հանրապետությունը գիտի, որ իմ որդուն սպանել է Արամ Հարությունյանը' 10 տարի առաջ: Դատական պրոցեսներ են գնացել' չեմ կարողացել ոչ մի արդյունքի հասնել: Հիմա գլխավոր բժշկի կռվշտոց ա, քննություններ է լինելու, 5 տարին լրացել ա: Շատ բաներ կա, որ սխալ է գրված: Օրինակ, գրել են, թե 3-րդ վիրահատությունը Արամն է կատարել, բայց նա դա չի կատարել' նշանակել է: Ձեռքից խլել' տարել ենք հոսպիտալ, արդեն փրկել հնարավոր չէր, սիրտը կանգնել էր: Նշված է, որ 130.000 դրամ շտապօգնության համար եմ տվել բայց իրականում այն տվել եմ այն ժամանակ, երբ Էրեբունի էինք տեղափոխում»,-ասաց տիկին Ալվարդը' մանրամասնելով.
«Ոչ մի կոտրվածք չուներ երեխեն, ասաց' տարեք ինձ տուն: Դեպքը տեղի է ունեցել հուլիսի 24-ին, վիրահատություն կատարել է 25-ին: Ասում էր' Երևան չի հասնի, շտապ պետք է վիրահատենք: Էրեբունու հիվանդանոց հասցնելուց հետո Սոսը մահացավ, այնտեղ պարզել են, որ նա ոչ մի կոտրվածք չունի, մահը վրա է հասել սխալ վիրահատությունների արդյունքում առաջացած որովայնամզի բորբոքումից (պերիտոնիտ):
Իմ գործը հասավ մինչև Եվրադատարան, բայց լրիվ ծածկեցին: Երևանի քննչական վարչությունն էր զբաղվում այդ հարցով, գնացի-եկա, գնացի-եկա հետո գլխավոր դատախազությունից պատասխանեցին, որ ժամկետ ես կորցրել: Նոր ի հայտ եկած հանգամանքներով ոչ մի որոշում չտվեցին: Կաշառք է տվել, անգամ այնտեղ նշվում է, որ Սոսի մահը տրավմատիկ բնույթ չունի: Թղթերը հավաքել' տվել եմ. առաջին ատյանի դատարանը մերժեց, վերաքննիչն էլ, դե վճռաբեկն էլ ոչինչ չի անում, թղթերը հետ է տալիս: Եվրադատարան նամակը ուղարկել ենք 2010թ. դեկտեմբերին, 2012թ. պատասխանեցին, թե ինչ-ինչ հոդվածներ չեն համապատասխանում: Մեր երեխեքը զոհեր են: Նախագհին էլ ասել եմ' խոստացար, ինչու չհանեցիր' ժողովուրդը պրծներ: Ժողովուդը վախենում է. քույրեը, բժիշկները: Ո՞ւր են, ինչու չեն բողոքում: Հիմա ես թոշակառու եմ, մենակ նստած եմ տանը, ոչ ոք չկա, ոչ տղա, ոչ թոռ…»
Ինչ վերաբերում է դեղատանը' բնակիչները փաստեցին, բժիշկները կանգնած' ասում է, թե գնացեք' այնտեղից առեք: Բավական է' մեկը գնա էժան տեղից առնի' չի թողնի:
Քաղաքացիները նշեցին, որ դիմել են բոլորին. Տավուշի մարզպետարան, ՀՀ Առողջապահության նախարարություն, դատարան: Ինչ վերաբերում է բժշկի ընտրությանը, ապա բնակիչների փաստմամբ եղել է մի երիտասարդ, ում ցանակցել են նշանակել, բայց, բնականբար չի ստացվել, համոզել' վարիչ են նշանակել, հիմա էլ նա դուրս է եկել: Ասենք գյուղից մեկը վատանում է' բժիշկ են կանչում Բերդից, վերջերս կանչել են' առանց թթվածնի բալոնի մեքենան հասել է, իսկ տղան' մահացել:
Պարզվում է' դեպքերի հետ կապված, տեղի բնակիչների միակ օգնությունը տեղի հիվանդանոց չդիմելն է, ուրիշ ոչինչ…
Փաստի առիթով կապ հաստատեցինք ՀՀ առողջապահության նախարարության մամլո խոսնակ Անահիտ Հայթայանի հետ, ով և հարցին, թե զբաղվո՞ւմ են վերոնշյալ հարցով' պատասխանեց.
«Այո, իհարկե: Ճիշտ է, մենք իրավաբանորեն լիազորված չենք. Նրանց լիազորություններ տալիս է մարզպետը, այսինքն աշխատանքից ազատելը, նկատողություն անելը բացառապես վերապահված է մարզպետին, բայց մենք իրավունք ունենք պահանջել և իմանալ, թե ինչ է կատարվում: Բոլոր դեպքերում պաշտոնապես նամակ ենք գրել Տավուշի մարզի առողջապահության վարչությանը, որպեսզի ուսումնասիրեն և զեկուցեն' ինչ է կատարվում և ինչն է պատճառը, որ նման բողոքներ կան»:
Սակայն, ինչպես երևում է, ՀՀ առողջապահության նախարարության ուղարկած նամակը տեղ չի հասել, քանի որ ոչ դրանից, ոչ բնակիչների բողոքներից այնտեղ տեղյակ չեն.
«Մեզ պաշտոնապես ոչ մի նամակ չի եկել: Մենք էլ ձեր նման ենք համացանցում կարդացել: Մեզ նամակ չի եկել, մենք որևէ բողոք չենք ստացել: Ոչ պաշտոնական և ոչ էլ' ոչ պաշտոնական: Իսկ տնօրենի գործունեությունից տեղյակ ենք, ոչ մի արտառոց բան չկա»,-պատասխանեց Տավուշի մարզպետարանի առողջապահության և սոցիալական ապահովության վարչության պետ Կարինե Դովլաթբեկյանը:
