2013-ը շատ վատն էր, ես այսքան վատ տարի երբեւէ չեմ ունեցել, սպասում էի' շուտ վերջանա այս տարին. Yerkir.am-ի հետ զրույցում նշեց Մնջախաղի թատրոնի հիմնադիր եւ գեղարվեստական ղեկավար Ժիրայր Դադասյանը:
Ըստ նրա, անիմաստ, անհասկանալի, անսպասելի զոհեր ունեցանք 2013-ին, ինչի համար էլ Դադասյանն ուզում է, որ տարվա «իզն ու թոզը» շուտ վերջանա, եւ նոր տարին շուտ մտնի հունի մեջ եւ այն կարգին տարի լինի:
«Վատն էր, շատ վատ տարի էր. ես երբեք չէի տեսել, որ մի տարվա մեջ այսքան մարդիկ սրբեր-տաներ: Ոգին ընկած է մեր ժողովրդի, իսկ ազգի ոգին ապահովվողը մտավորականն է: Ո՞վ պետք է մարդկանց տանի իր հետեւից. կարծում եմ' ոչ քաղաքական գործիչները, այն էլ' ընդդիմադիր համարվող, քանի որ այդ ֆոկուսը' ընդդմիադիր, իշխանամետ, էլ չի գործում: Միտքը պետք է առաջնորդի, ոչ թե այն մարդը, որը վատ թատրոն է խաղում' քաղաքականություն կոչվող թատրոն»,-ասաց Դադասյանը:
Նոր տարում առաջին հերթին, Դադասյանի հավաստմամբ, պետք է համապատասխան միջավայրի ստեղծման մասին մտածենք. ռաբիս երգիչներով, նրա կարծիքով, մենք այդ միջավայրը չենք ստեղծի: Ըստ Դասադյանի, եթե այսպես շարունակվի, տանելու է հիասթափության, իսկ ավելի վատ բան, քան' հիասթափությունը, չի կարող լինել:
«Բա որ ես էլ հիասթափվեմ, ես ինձ վրա աշխատում եմ, որ նման բան չլինի, բայց ես էլ եմ, չէ, մարդ: Այ մարդ, թարգեք ռաբիսը, արգելեք՝ ինչպես ստիպեցիք ամրագոտիներ կապել: Հոգեւոր անվտանգության համար պետք է արգելել այդ երաժշտությունը, քանի որ ռաբիսը զուտ երաժշտություն չէ, մտածողություն է, որը քայքայում է, ճահիճ է, որից դուրս գալ չի լինում»,-ասաց Դադասյանը:
Դադասյանի հավաստմամբ, նորմալ չէ, երբ մարդիկ պարտքով են Նոր տարին նշում: Նրա կարծիքով, մենք գտնվում ենք հոգեբանական ճնշված վիճակում, եւ այստեղ բոլորս ենք մեղավոր, որ մեզ գցել ենք կրակը:
Վերջում Դադասյանը նշեց, թե կցանկանար, որ պայծառ լինի 2014-ը, մանավանդ' այս տարի Մնջախաղի հիմնադրման 40-ամյակն է լրանում, չնայած' չգիտեն' որտեղ ենք նշելու հոբելյանը, քանի որ թատրոնի շենքի հարցը մնում է չլուծված:
