Ադրբեջանում մարդու իրավունքների հետ կապված իրավիճակը լինելու է Եվրոպայի Խորհրդի գլխավոր քարտուղար Թորբյորն Յանգլանդի' մայիսի 8-ին Բաքու ծրագրած այցի օրակարգի գլխավոր թեմաներից մեկը: Այս մասին հայտնում է «Թուրան» լրատվական գործակալությունը:
Ըստ գործակալության' Յանգլանդը Բաքվում կանդրադառնա նաև Ադրբեջանի խաղաղության և ժողովրդավարության ինստիտուտի տնօրեն, իրավապաշտպան Լեյլա Յունուսին և նրա ամուսնուն' Ադրբեջանի իրավապահների կողմից ապօրինաբար բերման ենթարկելու, նվաստացնելու և ճնշումներ գործադրելու փաստին:
Բացի այդ, անդրադարձ է կատարվելու Ադրբեջանում քաղաքական բանտարկյալների թեմային և այդ խնդրի լուծման անհրաժեշտությանը' կապված Եվրոպայի Խորհրդի նախարարների կոմիտեի նախագահությունը Ադրբեջանի կողմից առաջիկայում ստանձնելու հետ:
Լեյլա Յունուսը եւ նրա ամուսինը բերման են ենթարկվել' որպես լրագրող Ռաուֆ Միրկադիրովի գործով կասկածյալ, ով գտնվում է հետաքննության տակ' Ադրբեջանի Քրեական օրենսգրքի «հայրենիքին դավաճանության» հոդվածով: Ռաուֆ Միրկադիրովին մեղադրում են այն բանում, որ «ժողովրդական դիվանագիտության» միջազգային ծրագրով նա մի քանի անգամ այցելել է Հայաստան և, իբր, համագործակցել հայկական հատուկ ծառայությունների հետ: Լեյլա Յունուսը Ռաուֆ Միրկադիրովի ապօրինի ձերբակալությունից հետո հայտարարել էր, որ հերթն իրենն է, քանի որ Ադրբեջանի իշխանությունը ցանկանում է ազատվել միջազգային կազմակերպությունների հետ համագործակցող անկախ, ոչ կառավարական կազմակերպություններից և նրանց փոխարեն ներկայացնել իշխանամետ կազմավորումներ:
Այս տարվա սկզբին Բաքվում կազմակերպված մամուլի ասուլիսում Լեյլա Յունուսը հայտարարել էր, որ Ադրբեջանում 97 քաղաքական կալանավորներ և 38 «խղճի բանտարկյալներ» կան: Նրա խոսքով, քաղաքական դրդապատճառներով ձերբակալված 116 մարդու նկատմամբ դատարանն արդեն վճիռ է կայացրել, 12 մարդու գործերը գտնվում են դատարանում, ևս 6 մարդու նկատմամբ հետաքննությունը շարունակվում է:
Իրավապաշտպանը նշել է, որ նրանք բոլորը բանտարկվել են շինծու մեղադրանքներով այն բանի համար, որ համարձակվել են քննադատել իշխանություններին:
Իրենց հերթին Ադրբեջանի իշխանությունները հերքում են երկրում քաղաքական բանտարկյալների առկայությունը և նշում, որ դատապարտվածները պատիժ են կրում կատարած հանցագործությունների համար:
