Ֆինանսների նախարարության օպերատիվ հետախուզության վարչության 8-րդ բաժինը տեղափոխվող ապրանքների ուղեկցող փաստաթղթերի առկայությունն ու ճշտությունը ստուգելու օպերատիվ-հետախուզական միջոցառումներ է իրականացրել «Արաքս թռչնաֆաբրիկա» ընկերությունում եւ արձանագրել մի շարք խախտումներ: Ինչպես «Արմենպրես»-ին տեղեկացրին Ֆինանսների նախարարության տեղեկատվության և հասարակայնության հետ կապերի բաժնից, պարզվել է, որ թռչնաֆաբրիկային պատկանող Երևանի Արտաշիսյան 103 հասցեում գործող պահեստ-սառնարանից «Ֆորդ» մակնիշի ավտոմեքենայով մատակարարում է իրականացվել Վանաձոր քաղաք: Բեռնափոխադրման պահին աշխատակիցներն, օրենքով սահմանված կարգով, պահանջել են բեռն ուղեկցող փաստաթուղթ: Ուսումնասիրությամբ պարզվել է, որ առաքումների գրքում առկա են անճշտություններ՝ օրենքի կոպիտ խախտումներով: Միաժամանակ, 8-րդ բաժնի մյուս աշխատակիցները Երևանում ճշտել են դրանց իսկությունը: Արդյունքում ստացվում է, որ փաստաթղթերով որպես ապրանքների ստացող կողմ ցույց է տրվում գազել մակնիշի պահեստ-ավտոմեքենան, սակայն այն իրականում բեռնաթափվում է Վանաձորի շուկայի հետնամասում գտնվող պահեստային տարածքում, որը, սակայն հայտարարագրված չէ հարկային տեսչությունում և այստեղից էլ հիմնականում առանց փաստաթղթերի ապրանքներն իրացվել են տարբեր գնորդների:

Հաշվապահական փաստաթղթերի ուսումնասիրությամբ պարզվել է, որ նման գործելաոճը պարբերական բնույթ է կրել. առաքվող-տեղափոխվող ապրաքնների գրանցման գրքի միևնույն էջի և տողի համարով, տարբեր մեքենաների վրա դուրս են գրվել տարբեր քանակների և արժողության ապրանքների տեղափոխման բեռնագրեր, որոնցից սակայն ընդամենը մեկն է հաշվապահորեն ձևակերպվել, որպես կանոն' գումարով ամենափոքրը: Այս դեպքում ընկերության դուրս գրված փաստաթղթերով առաքվող ապրանքների զգալի մասը համապատասխան հաշվապահական ձևակերպումներ չի ստացել, հետևաբար չի ներառվել հարկային հաշ վետվություններում արտացոլվող իրացման շրջանառության մեջ. այդպիսով ընկերությունը խուսափել է հարկային պարտավորությունների ամբողջական կատարումից: Հայտնաբերված խախտումների վերաբերյալ կատարվում են հաշվարկներ պետությանը պատճառած վնասի չափը ճշտելու համար:

Տնտեսությունում գործարքների համատարած փաստաթղթավորումն ապահովելու նպատակով Ֆինանսների նախարարության օպերատիվ հետախուզության վարչության 8-րդ բաժինը, որը զբաղվում է բացառապես խոշոր բիզնեսի վերահսկողությամբ, ընթացիկ տարվա հուլիսին 15 տնտեսվարողների մոտ իրականացրել է օպերատիվ-հետախուզական միջոցառումներ: Արդյունքում դուրս գրված հարկային հաշիվների քանակը հունիսի համեմատ աճել է ավելի քան 42 հազարով, իսկ գումարային արտահայտությամբ՝ իրացման շրջանառությունն ավելացել է շուրջ 2.5 միլիարդ դրամով: