Թուրքիայի նորընտիր նախագահ Ռեջեփ Թայիփ Էրդողանի' սեպտեմբերի 3-ին Բաքու կատարելիք այցի շեմին ադրբեջանական ԶԼՄ-ներում կարծիքներ են հնչում, որ Էրդողանը զիջումների չի գնա հայկական հարցում, քանի որ նրա գլխավորած Թուրքիան «այլեւս նախկինը չէ»:
«Էրդողանը քեմալիստական Թուրքիան վերադարձրել է օսմանյան ակունքներին: Ներկայիս Թուրքիային եւ Արեւմուտքին քաղաքակիրթ ջրբաժան է բաժանում: Դա ոչ միայն աշխարհայացքային, արժեքային, այլ նաեւ քաղաքական դիմակայություն է: Թուրքիան այլեւս հենման կետ չէ լիբերալ Արեւմուտքի համար: Եւ Թուրքիան այլեւս հրաժեշտ է տվել եվրոպական հանրություն մտնելու իր հույսին' չնայած, ձեւականորեն ներկա է ՆԱՏՕ-ում», -գրում են ադրբեջանական ԶԼՄ-ները:
Ինչպես հաղորդում է «Արմենպրես»-ը, ըստ ադրբեջանական ԶԼՄ-ների' խոսակցություններն այն մասին, որ թուրք կառավարիչը ինչ-որ զիջումների կգնա Հայաստանին, կճանաչի Հայոց ցեղասպանությունը, գլուխ կխոնարհի Ծիծեռնակաբերդի հուշահամալիրում, զուրկ են առողջ դատողությունից: Նման մտքեր թույլ տվող մարդիկ չեն ճանաչում Էրդողանին: Նա Վիլլի Բրանդտ չէ: Յուրաքանչյուր ելույթում իր ազգային հպարտությունը եւ Օսմանյան կայսրության հիմնադիր Սուլեյման սուլթանին գովերգող կառավարիչը չի գնա այդ քայլին: Գոնե այն պատճառով, որ նա հասկացվել չի կարող իր վերջին դաշնակցի' ժողովրդի կողմից:
Ադրբեջանական մամուլը համոզմունք է հայտնում, որ ցյուրիխյան գործընթացին Էրդողանը սրտի կսկիծով ստիպված է եղել գնալու Արեւմուտքի ճնշման տակ: «Եվ միանագամայն հավանական է, որ այդ ժամանակ Բաքվում սկսված հակաթուրքական արշավը համաձայնեցված է եղել Էրդողանի հետ: Նրան ծանրակշիռ առիթ էր պետք, որպեսզի ետ կանգներ հայկական հարցում Արեւմուտքի հետ պայմանավորվածություններից», -նշում է մամուլը:
Բաքվում գտնում են, որ եթե 2009 թվականին այն ժամանակվա իշխանության աղբյուրը ժողովուրդը, նուրսիզմը, քեմալիզմը, Արեւմուտքի աջակցությունը, վերնախավերի ժառանգորդությունն էին, ապա այսօր նոր թուրքական իշխանության միակ աղբյուրը ինքն Էրդողանն է: Պատմական ընտրության համար ամբողջ պատասխանատվությունը միայն նրա վրա է: Քանի որ նա է ստեղծել իր իշխանությունը' իր կերպարի եւ իր նման, եւ ժողովուրդը թույլ է տվել դա անել:
«Էրդողանը ոչ մի հանգամանքում չի ճանաչի ցեղասպանությունը: Կլինեն հանդիպումներ, անսպասելի հրավերներ, տարօրինակ այցելություններ եւ արխիվային հետազոտություններրի անխուսափելիության մասին հին հռետորաբանություն, սակայն, առանց մինչեւ ղարաբաղյան հակամարտության մասնակի կարգավորման, նա չի գնա ոչ մի զիջման: Էրդողանն ամեն ինչի ունակ է, բայց միայն ոչ քաղաքական խելագարության», -համոզված են Բաքվում:
