ՀՀ բնապահպանության նախարար Արամայիս Գրիգորյանն այսօր' մարտի 9-ին, ընդունել է KfW գերմանական բանկի պատվիրակությանը' ծրագրի ղեկավար Սանդրա Սուարեսին, ներդրումային ծրագրերի տեխնիկական մասնագետ Թոմաս Վոլֆին, KfW հայաստանյան ներկայացուցիչ Զառա Չատինյանին և բանկի կողմից հրավիրված ջրային ռեսուրսների մասնագետ Քրիստոֆ Քյուլսին: Կողմերը քննարկել են ՀՀ ջրային ռեսուրսների կենտրոնացված կառավարման համակարգ մշակելու և ներդնելու հարցերը:
Ինչպես «Արմենպրես»-ին տեղեկացրին ՀՀ բնապահպանության նախարարության հասարակայնության հետ կապերի բաժնից, Արամայիս Գրիգորյանը, ընդգծելով ՀՀ ջրային ռեսուրսների արդյունավետ կառավարման անհրաժեշտությունը, նշել է.
«Տարիներ շարունակ ստորերկրյա ջրերի անարդյունավետ օգտագործումը, ոռոգման համակարգում առկա տեխնիկական խնդիրներն ու անբարենպաստ պայմանները բերել են ջրային ռեսուրսների հսկայածավալ կորուստների, ինչն այսուհետ անհրաժեշտ է բացառել, ուստիև 2014թ. օգոստոսին մենք դիմել ենք KfW գերմանական բանկին' Արարատյան դաշտավայրում ստորգետնյա ջրային ռեսուրսների ավտոմատ կառավարման, ինչպես նաև ՀՀ ջրային ռեսուրսների կենտրոնացված կառավարման համակարգ մշակելու և ներդնելու խնդրանքով:
KfW բանկի կողմից նշանակվել է փորձագետ, ում հանձնարարվել է համակարգի համար մշակել և համապատասխան շահառուների հետ միասին քննարկել հավանական հայեակարգ: Ես վստահ եմ, որ այս հայեցակարգը դառնալու է այն լավագույն մեկնարկը, որի շնորհիվ մենք կկարողանանք լուծել մեր առջև դրված մարտահրավերը»:
Ծրագրի ղեկավար Սանդրա Սուարեսը նշել է, որ ներկայում քննարկումներ են անցկացվում նաև ՀՀ գյուղատնտեսության նախարարության Ջրային տնտեսության պետական կոմիտեի հետ' Շիրակի մարզի վերգետնյա ջրային ռեսուրսներով Արարատյան դաշտի ջրամատակարարման վերաբերյալ հետագա հավանական ծրագրի շուրջ: Եվ քանի որ երկու գերատեսչությունների խնդիրները փոխկապակցված են միմյանց հետ, ուստի KfW-ի կողմից առաջարկվում է վերգետնյա և ստորգետնյա ջրային ռեսուրսների կառավարման հարցերը մեկտեղել, ուսումնասիրել և նախագծել առանձին բաղադրիչներով մեկ միասնական ծրագրի շրջա նակներում:
KfW բանկի ներկայացուցիչները նշել են, որ ծրագիրը կքննարկվի շահագրգիռ գերատեսչությունների և նախարարության մասնագետների հետ, կարվեն համապատասխան առաջարկություններ և փոփոխություններ, ինչից հետո կտրվի ծրագրի մեկնարկը: Ծրագիրն իրականացվելու է երկարաժամկետ փուլային տարբերակով:
Ծրագրի նպատակն է մշակել ու իրականացնել վերգետնյա ջրային ռեսուրսների պահեստավորման ու Շիրակի հյուսիսից դեպի Արարատյան դաշտավայր փոխադրման միասնական համակարգ, որը կապված կլինի Արարատյան դաշտավայրում ոռոգման սխեմաների ու պահեստավորման կարողությունների կամ ջրային հորիզոնների պաշարների ավելացման հետ:
Վերլուծել, մշակել և ուսումնասիրել ջրային պահանջարկները, որոնք առաջացել են կլիմայի փոփոխության, հողօգտագործման և սոցիալ-տնտեսական զարգացման հետևանքով: Մշակել մոնիթորինգի համակարգ և պիլոտային վերահսկողության ու տվյալների հավաքագրման համակարգ' ստորգետնյա ու վերգետնյա ջրային ռեսուրսների միասնական կառավարման ու ոռոգման սխեմաների համար:
Մշակել և իրականացնել վերգետնյա ու ստորգետնյա ջրային ռեսուրսների կայուն կառավարում, որը հիմնված կլինի բնապահպանական ու տնտեսական չափանիշներով կառավարման սկզբունքների վրա: Բարելավել Արարատյան դաշտավայրի ստորգետնյա ջրային ռեսուրսների պահպանությունը' նվազագույնի հասցնելով ջրային հորիզոնների արտահոսքը, աղտոտումն ու աղակալումը:
