Երևանի Վարդանանց փողոցում այսօր՝ նոյեմբերի 24-ին, ժամը 20:30-ի սահմաններում կրակոցներ են հնչել, ինչի հետեւանքով երիտասարդ է մահացել:

NEWS.am-ին ականատեսները պատմեցին, որ երիտասարդն իջել է մեքենայից, հենց այդ պահին հնչել է կրակոց, ինչի հետեւանքով երիտասարդը մահացել է:

Շարունակությունը՝ այստեղ:

***

Ռուսական Սու-24-ը կործանվել է Սիրիայում՝ Թուրքիայի հետ սահմանի վրա

Ռուսական Սու-24 ինքնաթիռը վթարի է ենթարկվել Սիրիայում, ենթադրաբար, խոցման արդյունքում, հաղորդում է ՌԴ պաշտպանության նախարարությունը:

«Այսօր Սիրիայի տարածքում, ենթադրաբար, խոցման հետևանքով վթարի է ենթարկվել ռուսական ավիախմբին պատկանող Սու-24 ինքնաթիռը»,- հայտնում են ՌԴ ռազմական գերատեսչությունից:

«Ինքնաթիռը եղել է 6000 մետր բարձրության վրա: Օդաչուների ճակատագիրը ճշգրտվում է: Ըստ նախնական տվյալների՝ օդաչուներին հաջողվել է կատապուլտացվել: Նաև պարզվում են ռուսական ինքնաթիռի անկման հանգամանքները: Պաշտպանության նախարարությունը հայտարարել է, որ թռիչքի ամբողջ ընթացքում ինքնաթիռը եղել է միայն Սիրիայի տարածքում»,- հավելել են ՌԴ պաշտպանության նախարարությունում:

***

Թուրքիան կթիրախավորի՞ ՀՀ-ում ՌԴ ռազմաբազան. արևելագետը նման ելքը համարում է համաշխարհային պատերազմի սկիզբ

Թուրք-սիրիական սահմանին թուրքական կողմը կործանել է ռուսական Սու-24 ինքնաթիռ:

Ռուսական կողմի պնդմամբ՝ ինքնաթիռը չի հատել Թուրքիայի սահմանը, Թուրքիան հակառակը՝ պնդում է, որ այն հատել է իրենց երկրի սահմանը, ավելին՝ իրենք քանիցս զգուշացրել են այդ մասին: Այդ երկրի նախագահ Ռեջեփ Թայիփ Էրդողանը հաստատել է, որ Սիրիայի երկնքում թուրքական զինվորականները խոցել են ռուսական Սու-24 ինքնաթիռը:

ԼՈւՐԵՐ.com-ի թղթակցի հետ զրույցում Հայաստանի գիտությունների ազգային ակադեմիայի Արևելագիտության ինստիտուտի տնօրեն Ռուբեն Սաֆրաստյանը կարծիք հայտնեց, որ սա աննախադեպ իրադրություն է վերջին շրջանի համար, պետք է սպասել, որ երկու երկրների միջև կարող է բավականին սրվել իրավիճակը:

Մեր այն դիտարկմանը, թե ՌԴ-ի հայաստանյան ռազմակայանը ի՞նչ դերակատարում կարող է ունենալ ստեղծված դրության պայմաններում, Սաֆրաստյանն ասաց. «Եթե իրադրությունը Թուրքիայի և ՌԴ-ի միջև սրվում է, ապա կարող է Հայաստանում ռուսական ռազմաբազան բերվել պատրաստվածության բարձր մակարդակի»:

Հարցրինք՝ հնարավո՞ր է Հայաստանում ռուսական ռազմակայանը Թուրքիայի համար թիրախ դառնա, արևելագետն ասաց. «Որևիցե ռուսական օբյեկտի թիրախավորումը՝ նշանակում է երրորդ համաշխարհային պատերազմ: Պետք է լրջորեն հետևել իրադարձություններին, որովհետև իրադրությունը շատ արագ է զարգանում: Պետք է տեսնել ինչ զարգացումներ կլինեն և պատրաստ լինել ամեն հնարավորին»,- ասաց մեր զրուցակիցը:

Սաֆրաստյանը նկատում է, որ պետք է հստակ հասկանալ, առաջին՝ ՌԴ-ն միջուկային երկիր է, երկրորդ՝ Թուրքիան ՆԱՏՕ-ի անդամ է, եթե երկու երկրնի միջև իրադրությունը սրվում է՝ նշանակում է սրվում է իրադրությունն ամբողջ աշխարհում:

Ն.Ա.