Առնվազն 421 մարդ է կալանավորվել Ֆրանսիայում այս գիշեր տեղի ունեցած անկարգությունների ընթացքում, տեղեկացրել է BFMTV-ն՝ հղում կատարելով ներքին գործերի նախարար Ժերալդ Դարմանենի շրջապատին։

Նրանցից 242-ը ոստիկանական տեղամասեր է տեղափոխվել Փարիզի Օ դը Սեն, Սեն-Սեն Դընի եւ Վալ դը Մառն արվարձաններից։

ՆԳՆ ղեկավարը հայտարարել է, որ կալանավորվել է ավելի քան 100 մարդ։ BFMTV-ն ավելի վաղ տեղեկացրել էր առնվազն 255 կալանավորվածի մասին։

Իրադրությունը Նանտերում մնում է լարված, Փարիզի արվարձանում շարունակվում են բախումները, տեղեկացրել է հեռուստաալիքը։ Մարսելում անկարգությունները հանդարտվել են։

Օբերվիլում այրել են ավտոբուսների պարկը, այրվել է 13 ավտոբուս։ Հրդեհ է բռնկվել նաեւ Կլիշի սու Բուայի ռատուշայում։

Սեն-Սեն Դընիում անկարգություններից տուժել է «գրեթե ամբողջ կոմունան», ասել է ոստիկանության աղբյուրը AFP-ին, գրել է Le Figaro-ն։ Շատ սուպերմարկետներ թալանվել են, հատկապես Փարիզի Մոնթրոյ եւ Էպինե սյուղ Սեն արվարձաններում։ Դրանսիում բեռնատարը խոցել է առեւտրի կենտրոնի մուտքը, խանութները մասամբ թալանված են եւ այրված, տեղեկացրել է զրուցակիցը։

Ֆրանսիայի մեծ մասում հաջողվել է վերականգնել «հաստիքային հանդարտությունը», գրել է թերթը։

Անկարգությունները սկսվել են հունիսի 28-ի գիշերը, այն բանից հետո, երբ ոստիկանը գնդակահարել էր 17-ամյա Նաել Մ.-ին, որի ընտանիքը ալժիրյան ծագում ունի։ Անկարգություններն սկսվել են Նանտերում, ինչից հետո տարածվել են այլ արվարձաններում եւ քաղաքներում։ Պատանուն կրակած ոստիկանը կալանավորվել է։ Նախագահ Էմանուել Մակրոնը սպանությունն անվանել է «անբացատրելի եւ աններելի»։