Սիրիայում հակամարտության սկսելուց հետո զոհվել է 93 հազար մարդ, իսկ ամեն ամիս զոհերի թիվն ավելանում է 5000-ով: Այս մասին հայտարարել է ՄԱԿ Մարդու իրավունքների հարցերով գերագույն հանձնակատար Նեւանեթհեմ Պիլեյը, գրում է ԻՏԱՌ-ՏԱՍՍ-ը:
Այս տարվա հունվարիին ՄԱԿ հրապարակած վերջին զեկույցում զոհերի թիվը նշվում էր 60 հազար: Հակամարտության սկսման պահից ընդհանուր առմամբ 263 հազար տեղեկություն է ստացվել մահվան դեպքերի մասին, սակայն հաշվվել են միայն այն դեպքերը, երբ հայտնի են զոհի անունը, մահվան ժամանակն ու վայրը: Զոհվածների 82.6%-ը տղամարդիկ են, 6.6 հազարը՝ անչափահաս:
Պիլեյը կարծում է, որ զոհերի իրական թիվը կարող է ավելի մեծ լինել:
Զեկույցի համաձայն, Դամասկոսի նահանգում զոհվել է 17.8 հազար, Հոմսում 16.4 հազար, Հալեպում՝ 11.9 հազար, Իդլիբում՝ 10.3 հազար, Դերաայում՝ 8.6 հազար, Համայում՝ 8.1 հազար, Դեյր Զորում՝ 5.7 հազար մարդ: Մայրաքաղաք Դամասկոսում զոհվել է 6.4 հազար մարդ:
