Փարիզում Թուրքիայի վարչապետ Ռեջեբ Թայիբ Էրդողանը եւ Ֆրանսիայի Նախագահ Ֆրանսուա Օլանդը Թուրքիա-Ֆրանսիա երկկկողմանի հարաբերություններին զուգահեռ քննարկել միջազգային հրատապ խնդիրներ, այդ թվում` Լեռնային Ղարաբաղի հակամարտության խաղաղ կարգավորման հարցը: Այս մասին հայտնում է «Անատոլու» լրատվական գործակալությունը:
Էրդողանը եւ նրան ուղեկցող պատվիրակությունը Ֆրանսիա են ժամանել Ավստրիայից' Եվրոպայի թուրք դեմոկրատների միության ստեղծման 10-ամյա տարելիցի կապակցությամբ Լիոնում անցկացվելիք միջոցառումներին մասնակցելու համար:
Թուրքական կառավարության աղբյուրները ԶԼՄ-ներին հայտնել են, որ Էրդողան-Օլանդ հանդիպման ժամանակ կողմերը համաձայնվել են մեծացնել համագործակցությունը' երկու երկրների միջեւ առեւտրի ծավալներն էլ ավելի մեծացնելու համար: Էրդողանը հույս է հայտնել, որ 2014 թվականը կհանդիսանա Թուրքիայի' Եվրամիությանն անդամակցության բանակցություններում նոր խորագրեր բացելու տարի:
Հանդիպման ժամանակ քննարկվել է Եվրոպայի էներեգտիկ անվտանգության հարցում Թուրքիայի հնարավոր դերակատարության եւ ադրբեջանական գազը Թուրքիայով Եվրոպա փոխադրելու Անդրանատոլիական գազատար խողովակաշարի նախագծի (TANAP) հետ կապված հարցեր:
Երկու առաջնորդները Իրաքի եւ Սիրիայի վերջին զարգացումներին զուգահեռ քննարկել են Ղրիմի եւ Ուկրաինայի, ինչպես նաեւ Լեռնային Ղարաբաղի հակամարտության խաղաղ կարգավորման հետ կապված հարցեր:
Փարիզ ժամանելուց առաջ Էրդողանն ու նրա գլխավորած պատվիրակությունը Վիեննայում մասնակցել է Եվրոպայի թուրք դեմոկրատների միության ստեղծման 10-ամյա հոբելյանական միջոցառումներին:
