Արցախի Նախագահ Բակո Սահակյանը հրավիրել է աշխատանքային խորհրդակցություն՝ նվիրված հանրապետության գյուղատնտեսության ոլորտում առկա խնդիրներին: Խորհրդակցության ժամանակ հատուկ ուշադրություն է դարձվել բերքահավաքի եւ բնական աղետներից տուժած տարածքների հողօգտագործողներին պետական աջակցություն տրամադրելու գործընթացներին:
Ինչպես «Արմենպրես»-ին տեղեկացրին Արցախի Հանրապետության Նախագահի աշխատակազմի տեղեկատվության գլխավոր վարչությունից, համապատասխան տեղեկատվություններով հանդես են եկել գյուղատնտեսության նախարարը եւ շրջվարչակազմերի ղեկավարները:
Կարեւորելով բերքահավաքի անկորուստ իրականացումը, բնական աղետների հետեւանքների հնարավորինս արագ վերացումն ու փոխհատուցման տրամադրումը՝ Նախագահ Սահակյանը կոնկրետ հանձնարարականներ է տվել համապատասխան մարմինների ղեկավարներին' դրանք պատշաճ մակարդակով կազմակերպելու համար:
Խորհրդակցությանը մասնակցել են վարչապետ Արա Հարությունյանը, պաշտոնատար այլ անձինք:
