Հայաստանը Եվրասիական տնտեսական միության անդամ պետությունների հետ 2014 թվականի ընթացքում իրականացրել է 1 մլրդ 450 մլն 311 հազար դոլարի առևտուր, որը կազմել է ընդհանուր առևտրաշրջանառության 24,5 տոկոսը:
«Արմենպրես»-ի հաղորդմամբ' Ռուսաստանի հետ առևտրի ծավալը նախորդ տարի ավելացել է 3.2 տոկոսով և կազմել 1 մլրդ 402 մլն 735.5 հազար դոլար: Ընդ որում, Հայաստանից ապրանքների արտահանումը նվազել է 7.7 տոկոսով և կազմել 308 մլն 409.7 հազար դոլար, իսկ ռուսական ծագման ապրանքների ներմուծումը Հայաստան ավելացել է 6.7 տոկոսով' կազմելով 1 մլրդ 94 մլն 325.8 հազար դոլար: 2014 թվականին Ռուսաստանին բաժին է ընկել Հայաստանից արտահանվող ապրանքների 20.3, իսկ ներմուծման' 24.9 տոկոսը:
Բելառուսի հետ առևտրաշրջանառության ծավալը 2014 թվականին նվազել է 19 տոկոսով և կազմել է 40 մլն 68 հազար դոլար: Դա ապահովել է ընդհանուր առևտրաշրջանառության 0.7 տոկոսը: Նշենք, որ Հայաստանից Բելառուս արտահանման ծավալը ավելացել է 5.5 տոկոսով' գերազանցելով 9 մլն դոլարը, իսկ ներմուծման ծավալը նվազել է 24,1 տոկոսով' կազմելով շուրջ 31 մլն դոլար:
Ղազախստանի հետ առևտրաշրջանառության ծավալը 2014 թվականին նվազել է 6.5 տոկոսով և կազմել շուրջ 7.5 մլն դոլար: Հայաստանից Ղազախստան արտահանումն այդ ընթացքում նվազել է 4.7 տոկոսով' կազմելով 6 մլն 951.8 հազար դոլար, իսկ ներմուծումը Հայաստան նվազել է 24.9 տոկոսով' կազմելով 556.3 հազար դոլար:
2015թ. հունվարի 2-ից Հայաստանը դարձել է Եվրասիական տնտեսական միության լիիրավ անդամ: 2014 թվականի հոկտեմբերի 10-ին Մինսկում ստորագրվել էր Եվրասիական տնտեսական միությանը Հայաստանի միանալու մասին պայմանագիրը։
Ստորագրված պայմանագիրն անցել էր Հայաստանի, Ռուսաստանի, Բելառուսի ու Ղազախստանի վավերացման ազգային ընթացակարգերով, իսկ դեկտեմբերի 23-ին Մոսկվայում՝ Եվրասիական տնտեսական բարձրագույն խորհրդի նիստում հայտարարվեց ԵՏՄ-ին Հայաստանի անդամակցության գործընթացի ամբողջացման մասին:
