Թուրքիայի նախագահ Ռեջեփ Թայիփ Էրդողանը կարճատեւ այցով այսօր տեղական ժամանակով 10:40-ին ժամանել է Իրան:
Ինչպես հաղորդում է «Արմենպրես»-ը, «Անատոլու» լրատվական գործակալությունը հայտնում է, որ Էրդողանը Թեհրան է մեկնել Իրանի նախագահ Հասան Ռուհանիի պաշտոնական հրավերով: Նրան ուղեկցում են Թուրքիայի արտաքին գործերի, էկոնոմիկայի, էներգետիկայի եւ բնական պաշարների, մաքսատների եւ առեւտրի, զարգացման, մշակույթի եւ զբոսաշրջության նախարարները:
Էրդողանը Թեհրանում կմասնակցի թուրք-իրանական Բարձր մակարդակի գործարար համաժողովի երկրորդ հավաքին: Ենթադրվում է, որ Էրդողանը կհանդիպի Իրանի կրոնական առաջնորդ Այաթոլլահ Սեիդ Ալի Խամանեի եւ նախագահ Ռուհանիի հետ:
Այցի ընթացքում Թուրքիայի եւ Իրանի միջեւ կարծիքներ կփոխանակվեն երկկողմանի հարաբերությունների բոլոր տեսանկյունների եւ տարածաշրջանային ու միջազգային թեմաների շուրջ:
Էրդողանը Անկարա կվերադառնա այսօր երեկոյան:
Եմենում զարգացումների հետ կապված՝ Էրդողանը քննադատության էր ենթարկել Իրանին եւ Թեհրանին մեղադրել տարածաշրջանում գերիշխանության ձգտելու մեջ: Այս հայտարարություններից հետո Իրանի խորհրդարանի մի քանի պատգամավորներ Էրդողանին կոչ էին արել Իրան չգալ եւ պահանջել էին հետ վերցնել Իրանի դեմ հնչեցրած մեղադրանքները:
