Ծաղկաձորում պաշտոնապես մեկնարկեց շախմատի աշխարհի հոբելյանական՝ 10­րդ թիմային առաջնությունը:
ՖԻԴԵ­ի նախագահ Կիրսան Իլյումժինովը, ողջունելով մասնակիցներին, պաշտոնապես առաջնությունը բացված հայտարարեց: Այնուհետև մասնակիցներին ներկայացվեց, որ այս տարի լրանում է Հայոց ցեղասպանության 100­-րդ տարելիցը: «Արմենպրես»­-ի հաղորդմամբ՝ հաջորդիվ կայացած վիճակահանությանը պարզվեց, որ առաջին փուլում միմյանց հետ կմրցեն Եգիպտոս­-Հնդկաստան, Իսրայել-­ Հայաստան, Ուկրաինա -Ռուսաստան, Կուբա­-Հունգարիա, Չինաստան­-ԱՄՆ թիմերի զույգերը:

Առաջին անգամ աշխարհի թիմային առաջնությունների պատմության ընթացքում մեկնարկող 50 շախմատիստներից 49-­ը կրում են գրոսմայստերի կոչում: Այս ցուցանիշը եզակի է շախմատային մրցաշարերի տարեգրության մեջ: Հայաստանն այն երկիրն է, որին արդեն երկրորդ անգամն է, որ բախտ է վիճակվում կազմակերպելու աշխարհի թիմային առաջնությունը: Հայաստանը մինչ այժմ մեկ անգամ հռչակվել է աշխարհի թիմային առաջնության չեմպիոն, երեք անգամ՝ բրոնզե մեդալակիր: