Ֆրանսիայի բոլոր ութ նավթավերամշակման գործարանները (ՆՎԳ) մայիսի 24-ին միացել են աշխատանքային օրենսդրության բարեփոխման հակառակորդների գործադուլին: Այդ մասին, ինչպես տեղեկացնում Է «Արմենպրես»-ը, հայտնել Է «Աշխատանքի համընդհանուր համադաշնություն» (CGT) արհմիության առաջնորդներից մեկը՝ Էմանուել Լեպինը:
Ֆրանսիայի հարավի երեք ՆՎԳ-ները կրճատել են արտադրությունը, հյուսիսի երեք ՆՎԳ-ները արգելափակված են գործադուլավորներով, եւս երկուսն ամբողջովին դադարեցրել են աշխատանքը: Իշխանությունների տվյալներով՝ երկրի այն ավտոլցակայանները, որտեղ վառելիքի խիստ անբավարարություն Է զգացվում, կազմում են 20 տոկոս:
«Մենք մտադիր ենք մինչեւ վերջ գնալ հանուն աշխատանքային օրենսդրության բարեփոխման օրենքի չեղարկման»,-BFMTV հեռուստաալիքի եթերում հայտարարել Է CGT-ի գլխավոր քարտուղար Ֆիլիպ Մարտինեզը:
Նրա խոսքով՝ արհմիությունները պատրաստ են երկխոսություն սկսել իշխանությունների հետ, սակայն գլխավոր պայմանը փորձաքար դարձած օրինագծի հետկանչումն Է եւ աշխատանքային նոր օրենսգրքի քննարկումը՝ աշխատավորների առաջարկությունների հաշվառմամբ:
«Մենք կոչ ենք անում գործադուլ հայտարարել տնտեսության բոլոր հատվածներում»,-ասել Է նա:
Մինչդեռ Ֆրանսիայի վարչապետ Մանուել Վալսը նույնպես հայտարարել Է, որ կառավարությունն ամուր կանգնած Է իր դիրքերում եւ զիջելու մտադրություն չունի: Մասնավորապես, իշխանությունները կշարունակեն ՆՎԳ-ների ապաշրջափակման գործողությունները ոստիկանության օգնությամբ:
«Մենք թույլ չենք տա, որ քաղաքացիները, մեր արդյունաբերությունը, մեր տնտեսությունը հայտնվեն պատանդի վիճակում»,-ասել Է վարչապետը, հաղորդել Է ՌԻԱ Նովոստին:
