ԵԱՀԿ գործող նախագահ, Ավստրիայի արտաքին գործերի նախարար Սեբաստիան Կուրցը ԵԱՀԿ Մշտական խորհրդին է ներկայացրել իր նախագահության հիմնական առաջնահերթությունները: Կուրցը հայտարարել է, որ Ավստրիան պատրաստ է 2000 թվականից այս կողմ արդեն երկրորդ անգամ ստանձնել ԵԱՀԿ նախագահությունը և նպաստել ԵԱՀԿ տարածքում անվտանգության և կայունության հաստատմանը:
Նա առանձնացրել է Ավստրիայի նախագահության երեք հիմնական առաջնահերթություն' նպաստել գոյություն ունեցող հակամարտությունների թուլացմանը, միավորել ուժերը ռադիկալիզմի և բռնի ծայրահեղականության դեմ պայքարում' մասնավորապես երիտասարդների շրջանում, վերահաստատել վստահությունը:
«Մեր նպատակն է ԵԱՀԿ ամբողջ գործիքակազմի միջոցով հասնել Եվրոպայում անվտանգության և կայունության հաստատմանը: Մենք պետք է աշխատենք մեր հասարակություններում կանխելու բռնի ծայրահեղականությունը»,- ասել է Կուրցը:
Որպես ԵԱՀԿ-ում նախագահող երկիր' նա առաջնահերթությունների շարքում նշել է նաև մեդիայի և կրոնական խմբերի դավանանքի ազատության, ինչպես նաև փոքրամասնությունների իրավունքների պաշտպանությունը:
«ԵԱՀԿ-ն անգամ ամենաբարդ իրադրության պայմաններում անդամ բոլոր երկրներին առաջարկում է լինել երկխոսության և քննարկման տարածք»,- հայտարարել է Կուրցը:
