Երեկվանից գրեթե բոլոր լրատվամիջոցներն ու ֆեյսբուքյան օգտատերերը քննարկում են այն հանգամանքը, որ Մշակույթի նախարարությունը մերժել է երիտասարդ արտիստի հոգեհանգիստի արարողությունը կազմակերպել Օպերայի շենքում: Լիլիթ Մակունցն այսօր մամուլի ասուլիսի ժամանակ անդրադարձավ այդ հարցին.
«Վահագնի վթարի մասին հենց նույն օրը ինձ տեղեկացրել է պարոն Օրբելյանը, ես էլ անմիջապես շտապել եմ հիվանդանոց, որպեսզի տեսնեմ՝ ինչ է հնարավոր անել նրա կյանքը փրկելու համար, կապ եմ հաստատել նաև Առողջապահության նախարարի հետ։ Մեզ դիմել են երեկ չէ առաջին օրը՝ ժամը 17:00-ի հատվածում, որպեսզի հաջորդ օրը՝ ժամը 12:00-ից 15:00-ն ընկած ժամանակահատվածում կազմակերպվի հոգեհանգիստ Օպերայում: Երեկ մեր աշխատակազմի ղեկավար Սամվել Մուրադյանը մեկնաբանել է, որ դա ոչ թե եղել է մերժում, այլ՝ պայմանավորված է եղել ընթացակարգով»,-նշեց Մակունցը:
Նախարարի պաշտոնակատարը խնդրանքով դիմեց բոլորին՝ այլևս չշահարկել այս փաստը: Նա պարզապես հետևել է ընթացակարգին, հակառակ դեպքում պետք է շրջանցեր ու խախտեր օրենքն, ինչն էլ ինքը չի արել:
«Չեմ արել անգամ այն պարագայում, երբ, իհարկե, գիտակցում եմ, որ հատկապես այս նախընտրական փուլում դա ինձ, որպես ռեյտինգային կարգով առաջադրված թեկնածուի, կարող էր բերել քաղաքական դիվիդենտներ: Չգնացի այդ քայլին, երբեք ինձ նման բան թույլ չէի տա», - ընդգծեց նա:
Մակունցը տեղեկացրեց, որ նախարարության առաջարկով Վահագն Մարգարյանի ընկերների հետ պայմանավորվածություն է ձեռք բերվել, որպեսզի Օպերայում նրա հիշատակին կազմակերպվի հիշատակի երեկո:
