ՀՀ նախագահ Արմեն Սարգսյանը դեկտեմբերի 28-ին նախագահի նստավայրում ընդունեց մանկատների, խնամքի կենտրոնների, գիշերօթիկ դպրոցների սաների:
«Արմենպրես»-ի հաղորդմամբ` երեխաների համար կազմակերպվել էր տոնական շոու-ծրագիր` տարբեր խաղային համարներով: Մասնագետների օգնությամբ երեխաները տոնական խաղալիքներ էին պատրաստել, որոնցով զարդարել էին դահլիճն ու տոնածառը:
«Ձմեռ պապից ցանկանում եմ, որ մեր բոլոր երեխաներն ամբողջ տարի ուրախ լինեն, երգեն, լավ նվերներ ստանան: Ուզում եմ, որ այն տղաները, ովքեր երազում են զինվոր դառնալ, դառնան և պաշտպանեն մեր հայրենիքը, բայց պատերազմ երբեք չլինի»,-նշեց Արմեն Սարգսյանը:
Նախագահը զրուցեց փոքրիկ հյուրերի հետ, հարցրեց նրանց անունները, տարիքը, երազանքների մասին և ասաց. «Ձեզանից յուրաքանչյուրը մեծ ապագա ունի, գիտեմ, որ մի քանիսը ծնողներ չունեն, մի քանիսն ունեն, շատերը դժվար են ապրում: Երբ ես ձեր տարիքին էի, կորցրեցի հորս: Դա բարդ է, բայց վստահ եմ, որ դուք այլ երեխաներից ավելի ուժեղ եք, քանի որ փոքր տարիքից կարող եք դժվարությունները հաղթահարել: Հասկանո՞ւմ եք, որ դուք լավն եք և, լավ սովորելու, աշխատելու դեպքում, կարող եք դառնալ Հանրապետության նախագահ. գուցե ավելի լավ աշխատանք ունենաք»,-շեշտեց Սարգսյանը:
Նա երեխաներին հարցրեց, թե իրենց պատկերացմամբ նախագահից ավելի լավ աշխատանք կա՞ արդյոք: Վերջիններս պատասխանեցին, որ ոչ: «Կարծում եմ, որ ուսուցչի աշխատանքն ավելի լավ է: Ինչ-որ իմաստով նախագահն էլ է ուսուցիչ, բայց ես ուսուցիչ եմ, որը ձեզ տարվա մեջ մեկ կամ երկու անգամ է տեսնում, իսկ նրանք այնքան բախտավոր են, որ ամեն օր են հաղորդակցվում ձեզ հետ»,-շեշտեց նախագահը:
Արմեն Սարգսյանը երեխաներին հորդորեց օգնության կարիք ունենալու դեպքում գրել իրեն:
Միջոցառումն անցկացվեց «SOAR» (Ծնողազուրկ հայ երեխաների օգնության միություն) բարեգործական հիմնադրամի աջակցությամբ:
