Արցախի արտաքին գործերի նախարար Մասիս Մայիլյանը իր ֆեյսբուքյան էջում գրել է․

«Այս տեսանյութը լուրջ մտորումների տեղիք տվեց և ստիպեց նորովի դիտարկել բարձրացված խնդիրը, ավելի լավ հասկանալ երիտասարդներին հուզող հարցերը։ Ողջունում եմ երիտասարդական այսօրինակ նախաձեռնությունները և գտնում եմ, որ պետք է խրախուսել ու փայփայել երիտասարդ սերնդի նախաձեռնողականությունը, հանրային կյանքում ակտիվորեն ներգրավվելու, հանրային մտքին թարմություն հաղորդելու նրանց մղումները։

Իրոք, հասարակական-քաղաքական իրադարձությունների հորձանուտում, ամենօրյա անհետաձգելի հարցերի լուծման գործում խրված լինելով՝ երբեմն չենք նկատում, թե ինչպես են կարծրանում մեր մոտեցումներն այս կամ այն հարցին, և որ ժամանակ չի մնում խնդիրները տարբեր տեսանկյուններից դիտարկելու, նոր ու հնարամիտ լուծումներ գտնելու համար, և, ինչ թաքցնենք, երբեմն դժվար է լինում արդեն իսկ փորձարկված-կարծրացած լուծումների «հարմարավետ» միջավայրից դուրս գալը։ Ու հենց այստեղ է, որ նոր կրթական միջավայրում մեծացած ու համաշխարհային զարգացումներին, նոր տեխնոլոգիաներին շահագրգիռ հետևող երիտասարդների գաղափարներն ու առաջարկներն ուղղակի օդի պես անհրաժեշտ են լինում։ Պարզապես պետք է զգալ ու հասկանալ դրա անհրաժեշտությունը։