Արտակարգ դրություն հայտարարելուց ի վեր ՀՀ կառավարությունը որոշում և շրջանառության մեջ է դնում քաղաքացիներին աջակցող մի շարք սոցիալական ու տնտեսական ծրագրեր: Առաջին հայացքից կարող է թվալ, թե ՀՀ բոլոր քաղաքացիները սոցիալական աջակցության գոնե մեկ ծրագրից կարող են օգտվել և քաղցած չեն մնա, մինչդեռ այդպես չէ: Քիչ առաջ ԼՈւՐԵՐ.com-ը ահազանգ ստացավ Վանաձոր քաղաքի մի բնակչուհուց: Վերջինս ասաց, որ ինքը սոցիալական աջակցության ծրագրերից ոչ մեկի պահանջներին չի համապատասխանում և հետևաբար չի կարող օգտվել որևէ մեկից: «Ես աշխատում եմ կարի արտադրամասում, մարտից հասկանալի պատճառնելով չենք աշխատում, բայց ես, ինչպես շատերը, սոցիալական խնդիրներ ունեմ, որոնց լուծման միակ հույսը սոցիալական աջակցության ծրագրերն էին: Շատ տխրեցի, երբ պարզ դարձավ, որ տեքստիլ արտադրամասում աշխատող մարդկանց համար աջակցություն չկա: Ես չգիտեմ՝ ինչպես է ստացվում, որ վարսավիրները, սպասարկման ոլորտում աշխատող մարդիկ կարող են օգտվել ծրագրից, իսկ տեքստիլ արտադրամասում աշխատողներս՝ ոչ: Աշխատավարձս շատ չէր՝ 95-100 հազար դրամ»,- նշեց քաղաքացին: Նրա խոսքով՝ իրենք հենց մարտի սկզբից հարկադիր պարապուրդում են և քանի որ գործարքային աշխատող է, հույս չունի, որ կվճարեն պարապուրդի համար: «Շատ ցավալի է, որ աջակցության որևէ ծրագրում չկանք: Եթե աջակցության ծրագրերից կարող են օգտվել 200 հոգի, ապա մյուսները ո՞նց ապրեն: Ինչո՞ւ են ժողովրդին հիմարի տեղ դնում: Հիմա պետք է ասեն ոչ թե հպարտ քաղաքացի, այլ՝ սոված: Պետք չէ մարդկանց հիմարի տեղ դնել»,-սրտնեղեց քաղաքացին:
