Շվեդիայում ստեղծվել է հանձնաժողով, որը կուսումնասիրի COVID-19 կորոնավիրուսային համավարակի դեմ պայքարի հարցում երկրի իշխանությունների մոտեցումները, գրում է Bloomberg-ը: Հետաքննությունը ղեկավարելու է Գերագույն վարչական դատարանի նախկին նախագահ Մաթս Մելինը:

Հանձնաժողովը գնահատական է տալու կառավարության և մարզային իշխանությունների գործողություններին, որոնք նրանք ձեռնարկել էին համավարակի տարածման դեմ պայքարելու համար, ինչպես նաև այդ քայլերը համեմատելու են այլ երկրներում ձեռնարկված միջոցառումների հետ: Վերջնական զեկույցը նախատեսված է ներկայացնել 2022-ի փետրվարին, իսկ մինչ այդ հանձնաժողովը կհրապարակի երկու նախնական զեկույց: Զեկույցներից առաջինը կներկայացվի նոյեմբերի 30-ին:
Իշխանությունների ձեռնարկած քայլերը հետաքննելու համար անկախ հանձնաժողովի ստեղծումը պահանջել են Շվեդիայի ընդդիմադիր կուսակցությունները, գրում է Deutsche Welle-ը: