Արդեն մի քանի օր է՝ մամուլի ուշադրության կենտրոնում Սնանկության դատարանի դատավորներ Գևորգ Նարինյանի և Արա Կուբանյանի կալանավորումն է: Գևորգ Նարինյանի նկատմամբ կալանքը երկամսյա խափանման միջոց ընտրելու՝ դատախազի միջնորդությունը բավարարվել է: Նրան մեղադրանք է առաջադրվել միանգամից 4 հոդվածներով: Դատավորը իրեն առաջադրված մեղադրանքը չի ընդունում։
Գևորգ Նարինյանը ԱԱԾ նախկին տնօրեն Արթուր Վանեցյանի խոսնակ, Հանրային հեռուստատեսության նախկին հաղորդավար Քրիստինե Մելքոնյանի ամուսինն է: ԼՈՒՐԵՐ.com-ը կապ հաստատեց Մելքոնյանի հետ՝ պարզելու՝ արդյոք նա ամուսնու կալանավորվելու մեջ տեսնում է քաղաքական երանգավորում, միգուցե ամուսինը թիրախավորվել է ԱԱԾ-ի կողմից այն բանից հետո, երբ Քրիստինե Մելքոնյանը սկսել էր համագործակցել «Հայրենիք» կուսակցության նախագահ Արթուր Վանեցյանի հետ, սակայն, Մելքոնյանը մեզ փոխանցեց, որ այդ թեմայով չի ցանկանում որևէ բան ասել. «Խնդրում եմ, ինձ մի անհանգստացրեք, ես որևէ հարցի չեմ պատրաստվում պատասխանել»,- նշեց նա:
