Ռուսաստանի արտգործնախարարության պաշտոնական ներկայացուցիչ Մարիա Զախարովան «Ռոսիա 1» հեռուստաընկերության եթերում մանրամասներ է հայտնել ղարաբաղյան հարցի կարգավորման շուրջ 11-ժամյա բանակցությունների ընթացքի մասին: Նրա խոսքով, ի սկզբանե դրանք խորհրդատվությունների բնույթ ունեին, բայց գործընթացի ընթացքում հնարավոր դարձավ մշակել մի փաստաթուղթ, որը կդառնար ղարաբաղյան կոնֆլիկտի կարգավորման ելակետ: «Երրորդ ընդմիջումից հետո դահլիճում լսվեց Սերգեյ Վիկտորովիչի ուրախ բացականչությունը։ Նա մեկ անգամ ևս հարցրեց կողմերին, թե արդյո՞ք ամեն ինչ համաձայնեցված է, և դրանից հետո միայն նա գնաց լրագրողների մոտ», - նշել է Զախարովան:
Նա ավելացրել է, որ այս խորհրդակցությունների ընթացքում նորովի է բացահայտել ռուսական դիվանագիտության ղեկավարին: «Ինձ մոտ տպավորություն է, որ այս փուլում նա նվիրվեց ամբողջովին, ներդրեց իր ողջ ինտելեկտը, բանակցային բոլոր ունակությունները, մարդկային որակները», - ասել է Զախարովան՝ հավելելով, որ Վլադիմիր Պուտինը նույնպես անձամբ էական դեր է խաղացել այս գործընթացում:
