Իսրայելի զինվորականները դարձել են իրենց իսկ իրավապաշտպանների քննադատության թիրախ: «Բթսելեմ» մարդասիրական կազմակերպությունը մեղադրել է Իսրայելի պաշտպանության բանակի ծառայողներին այն բանում, որ նրանք, Հորդանան գետի արևմտյան ափին գտնվող Հևրոն քաղաքում ձերբակալել են հնգամյա պաղեստինցի մի երեխայի: Երեխան, որի անունը Վադի Մասվադե է, քար է նետել մեքենայի վրա: Ավելի ուշ փոքրիկը ոստիկանությունում խոստովանել է, որ ինքը ցանկացել է քարով խփել կատվին, բայց այն դիպել է ավտոմեքենային: Այդ վրիպման համար 5-ամյա փոքրիկը ճակատ առ ճակատ բախվել է «զինվորական օպերատիվ զորաշարժի» հետ: Իրավապաշտպանների տվյալներով իսրայելցի զինվորները ձերբակալել են տղային և ուղեկցել տուն: Տանը զինվորները կապկպել են փոքրիկի հոր ձեռքերն ու աչքերը և այդ վիճակում պահել շուրջ մեկ ու կես ժամ: Այնուհետև հորն ու որդուն տարել են Հևրոնի ոստիկանական բաժանմունք և հանձնել պաղեստինցի ոստիկաններին: Ոստիկանությունում ձերբակալվածներին հարցուփորձ են արել կատարվածի մասին ու ազատ արձակել, հաղորդում է «ԻՏԱՐ-ՏԱՍՍ»-ը: Վերլուծաբանները գտնում են, որ այս միջադեպը կարող է ստանալ շատ մեծ հասարակական արձագանք: «Բթսելեմ»-ի աշխատակիցներն արդեն նշել են, որ զինվորներն իրավունք ունեն ձերբակալել 12 տարեկանից ավագ երեխաներին, իսկ դրանից փոքրերի համար պետք է գտնեն ներգործման այլ միջոցներ: Բանակի ներկայացուցիչները այդ մեղադրանքին ի պատասխան հայտարարում են, որ քարեր նետելը կարող է վնաս պատճառել անցորդներին և բերում են վիճակագրական տվյալներ, որոնց համաձայն ընթացիկ տարվա հունվար-մայիս ժամանակահատվածում այդպիսի միջադեպերի պատճառով տուժել է 150 իսրայելցի, հաղորդում է «vesti.ru»-ն: Բացի այդ բանակայինների հայտարարության մեջ առանձին նշվում է, որ երեխան չի ձերբակալվել և նրա նկատմամբ մեղադրանք չի առաջադրվել: