Սարսափելի վթարից հետո կոմայի մեջ ընկած 26-ամյա գործարար կինը Սերգիեւա Պասադայում ծննդաբերել է առողջ երեխայի' շուրջ 2 ամիս մնալով անգիտակից վիճակում: Սերգիեւա Պասադայի բժիշկները 2 ամիս պայքարել են 26-ամյա կնոջ եւ նրա' դեռեւս չծնված երեխայի համար: Շրջանային սովորական հիվանդանոցի բժիշկները ստիպված են եղել ծնունդ ընդունել, երբ մայրը' Նադեժդա Գլավնովան, գտնվել է կոմայի մեջ: Life News-ի փոխանցմամբ' ընտանիքի հայրը' Վիտալին, հուլիսի 23-ը կհիշի իր ամբողջ կյանքում, քանի որ ստիպված է եղել բյուրոկրատական մի շարք քաշքշուկներ եւ արգելքներ հաղթահարել, որպեսզի բժիշկներն, ի վերջո, ընդունեն իր տղայի ծննունդը: «Իհարկե, ես շատ էի անհանգստանում կնոջս համար, - Life News-ին պատմել է Վիտալին եւ ավելացրել,- հեշտ չէր ստանալ ծննդաբերության թույլտվությունը' Նադյայի լուրջ վնասվածքների պատճառով: Նյարդավիրաբույժները վախենում էին իրենց վրա վերցնել ծննդաբերության պատասխանատվությունը, իսկ մանկաբարձները' ծննդաբերության ժամանակ կնոջս վիճակի համար: Բայց ամեն ինչ լավ ավարտվեց: Գլավնովների ընտանիքը սարսափելի վթարի է ենթարկվել այս տարվա հունիսի 9-ին: Նադեժդան, Վիտալին, նրանց 6-ամյա աղջիկը' Քսենիան եւ նրանց ընկերների դուստրը' 10-ամյա Քրիստինեն, տուն էին վերադառնում զբոսանքից, երբ նրանց հարվածել է բեռնատարը: Երիտասարդ մորն ու երկու երեխաներին անմիջապես տեղափոխել են մոտակա հիվանդանոց' անգիտակից վիճակում: Իրավիճակն ավելի էր լրջանում նրանով, որ Նադեժդան 6 ամսական հղի էր: «Երկու շաբաթ հետո կնոջս վիճակը մի քիչ լավացավ»,- շարունակել է Վիտալին' նշելով, որ կոմայից նա անցում էր կատարել խորը քուն: «Դա մի տեսակ սահմանային, միջանկյալ վիճակ է: Պարզվեց, որ այդ ամբողջ ընթացքում, երեխան մոր արգանդում նորմալ զարգանում էր եւ ծննդաբերության հարցը պետք էր արագ լուծել»,- ասել է նա: Մոսկվայի ոչ մի հիվանդանոց չի համարձակվել իր վրա վերցնել ծծնդկանի եւ նորածնի կյանքի պատասխանատվությունը: Անսովոր ծննդաբերությունն ի վերջո տեղի է ունեցել Սերգիեւա Պասադի հիվանդանոցում, որտեղ բժիշկները, չունենալով թանկարժեք սարքավորումներ, կարողացել են ընդունել ծննունդը' փրկելով թե մոր եւ թե նորածնի կյանքը: Երեխայի անունն ընտրել է Վիտալիի եւ Նադեժդայի 6-ամյա դուստրը, ով գիտակցության է եկել մի քանի շաբաթ առաջ: - Քսենիան ասաց, որ եղբոր անունը պետք է լինի Կիրիլ,- ժպտալով ասել է Վիտալին, - ուրեմն այդպես էլ կլինի: Նորածնին արդեն կարող են դուրս գրել հիվանդանոցից եւ տեղափոխել տուն, սակայն մայրը դեռ գիտակցության չի եկել: - Գուցե հիմա, երբ արդեն նա ծննդաբերել է, Մոսկվայի հիվանդանոցներն արձագանքեն: Նա ուժեղ է, կհաղթահարի, ուղղակի պետք է նրան գոնե նման հնարավորություն ընձեռվի: