«Քննադատական տեսակետներ արտահայտող լրագրողների և այլոց հետապնդումները Ադրբեջանում մարդու իրավունքների պաշտպանության ոլորտում լրջագույն խնդիրների աղբյուր են: Իշխանությունները պետք է ազատ արձակեն կարծիքի արտահայտման համար բոլոր ձերբակալվածներին, փոխեն կարծիքի արտահայտման և հավաքների ազատության ոլորտի օրենսդրությունը և կիրառումը», -նախօրեին հայտարարել է Մարդու իրավունքների հարցով Եվրոպայի խորհրդի հանձնակատար Նիլս Մույժնիեքսը՝ ներկայացնելով ընթացիկ տարվա մայիսի 22-ից 24-ը Ադրբեջան կատարած այցի մասին իր զեկույցը: Առաջարկելով լիովին հրաժարվել զրպարտության քրեականացումից, Հանձնակատարն ափսոսանք է հայտնել առ այն, որ Ադրբեջանի նախագահը հունիսին ստորագրել է օրենսդրական փոփոխություններ, որոնք ուղղված են համացանցում զրպարտության մասին դրույթների կիրառման հեշտացմանը: Մյուս խնդիրը կապված է զրպարտության վերաբերյալ քաղաքացիական գործերով հաճախ նշանակվող չափազանց մեծ փոխհատուցման հետ: «Իշխանությունները պետք է ավարտին հասցնեն զրպարտության վերաբերյալ օրենսդրության բարեփոխումն այնպես, որպեսզի հանվի ազատությունից զրկելու պատժատեսակը և սանկցիաները դառնան համաչափ»,-ասել է նա: Ըստ ԵԽ պաշտոնական կայքէջի հաղորդագրության, Հանձնակատարը նաև ընդգծել է լրագրողների և ԶԼՄ-ների այլ աշխատակիցների նկատմամբ ակնհայտ հատուկ աչառու վերաբերմունք դրսևորող դատարանների անկախության և անաչառության ամրապնդման անհրաժեշտությունը: Բացի այդ, նա անհանգստացած է համացանցում հիմնական ազատությունների նկատմամբ վերջերս իրականացված սահմանափակումների կապակցությամբ: «Ակնհայտ է, որ ավելացել են ձերբակալությունները և քրեական հետապնդումները, ինչպես նաև սոցիալական ցանցերից օգտվողների նկատմամբ լայնածավալ վերահսկողությունը: Նման գործելաոճը պետք է անհապաղ դադարեցվի, ինտերնետը պետք է մնա կարծիքի ազատ արտահայտման տիրույթ»,-ընդգծել է Մարդու իրավունքների հարցով Եվրոպայի խորհրդի հանձնակատարը:
