ԳԱԼԱ ԼՂՀ ներկայիս փոխվարչապետ դաշնակցական Արթուր Աղաբեկյանը հերքում է մամուլում շրջանառվող այն տեղեկությունը, թե ինքը փոխվարչապետի պաշտոնը ստանձնելուց հետո կասեցրել է դաշնակցական գործունեությունը:

 

 

Այս մասին ԳԱԼԱ-ի հետ զրույցում նշեց ԼՂՀ փոխվարչապետ Արթուր Աղաբեկյանը.

 

 

«Դաշնակցականը որտեղ ապրում է, նա փոխանցագրով անցնում է այդ տարածքի կառույց, ես երբ տեղափոխվել եմ ԼՂՀ, փոխանցագրով տեղափոխվել եմ: Ես հիմա ԼՂՀ կոմիտեության ենթակա կառույցում շարքային դաշնակցական եմ»:

 

 

Ստորև ներկայացնում ենք հարցազրույցն ամբողջությամբ.

 

 

-Պարոն Աղաբեկյան, ի՞նչ կասեք ներկայիս դաշնակցական գործիչների մասին, ըստ Ձեզ՝ նրանք պահպանե՞լ են իրենց դաշնակցական կերպարը, թե՞ հեռացել են դրանից:

 

 

-Ինչքան ուսումնասիրել եմ Դաշնակցության պատմությունը, ապա պիտի ասեմ, որ, ցավոք սրտի, բոլոր ժամանակների սերունդը քննադատական խոսքով է հանդես եկել իր ժամանակի դաշնակցականների հասցեին, ու դա այդպես է Դաշնակցության հիմնադրման օրվանից:

 

 

Հիմա դա է ՀՅԴ-ն, այդպիսին ենք մենք, եթե վաղվա սերունդն է գնահատելու, ցավոք սրտի այդպես է, ես վստահ եմ, որ իրականում անհատները ՀՅԴ-ում մեծ դերակատարություն ունեն: ՀՅԴ-ն իր ստեղծման օրվանից շարժվում է իր տակտիկական ծրագրերով:

 

 

-Չեք կարծո՞ւմ, որ այնուամենյանիվ ՀՅԴ-ի վարկանիշն ընկել է, ինչի ապացույցը վեջին ընտրություններում ՀՅԴ-ի պարտություններն են:

 

 

-Դա մեր ժողովրդի ապատեղեկացված լինելու արդյունքն է, որը դեռ նախկին յոթանասուն տարիների արդյունք է. այսօրվա սերունդը վաղն իր զավակներին ասելու է, որ մենք սխալվել ենք: Ինչ վերաբերում է ներքին կոնֆլիկտներին, ապա ՀՅԴ-ում երբեք ներքին կոնֆլիկտներ չեն եղել, ես դա բազմիցս բարձրաձայնել եմ:

 

 

Մեր կուսակցական ժողովում ցանկացած գործիչ կարողանում է բարձրաձայնել իր կարծիքը, իր մտահոգությունները և ժողովի որոշումից հետո ուղղակի պարտավոր է կյանքի կոչել այդ որոշումը, իսկ քանի որ ժողովրդին խորթ է նման մոտեցումը, դրա համար էլ նման ասեկոսեներ են տարածվում:

 

 

-Անդրադառնանք Ադրբեջանի կողմից անդադար զինադադարի խախտման փաստին: Ուշագրավ է, որ ադրբեջանական կողմը հերքում է, որ իրենք են խախտել զինադադարը, ի՞նչ կասեք այդ մասին:

 

 

-Տեղեկատվական պատերազմը թող Ձեզ չշփոթեցնի. զինադադարի պայմանագիրը ստորագրելու հաջորդ օրվանից առ այսօր եղել են կրակոցներ, փոխհրաձգություն, վիրավորներ ու զոհեր, և ես, որպես Հադրութի պաշտպանական շրջանի հրամանատար, դրա ականատեսն եմ եղել, փոխնախարարի պաշտոնն եմ զբաղեցրել և դա տեսել:

 

 

Ունենալով իմ տեղեկությունները' վստահ եմ, որ դա շարունակվելու է: Ժամանակ առ ժամանակ այդ կրակն ակտիվանում է, երբեմն դադարում, ժամանակ առ ժամանակ առաջնագծում հայտնվում են դիպուկահարներ, դրանք անպատասխան չեն մնում. հայկական կողմի գործողություններով հաճախ են լռեցվում, և դա դեռ շարունակվելու է:

 

 

Համոզված եմ, որ ՀՀ-ն երբեք չի կարող վարել այնպիսի արտաքին քաղաքականություն, որը վտանգի ԼՂՀ-ի անկախությունը:

 

 

Ես դեռ 1994 թվականին եմ ասել, որ ՀՀ-ն պետք է ճանաչի ԼՂՀ-ի անկախությունը, հիմա երբ ետ հայացք եմ գցում, հասկանում եմ՝ ինչքան ճիշտ կլիներ, եթե 1994 թվականի զինադադարից հետո ՀՀ-ն ճանաչեր ԼՂՀ-ի անկախությունը, հետագա տարիների վարած քաղաքականությունը, վերելքները, ձեռք բերված հաջողությունը, ժամանակ առ ժամանակ տեղի ունեցած անհաջողությունները ինձ բերել են այն եզրակացության, որ ՀՀ-ի կողմից ԼՂՀ-ի անկախության ճանաչումը ուշացած գործողություն է, դրա անհրաժեշտությունը եղել է 1994-ին, երբ դա տեղի չի ունեցել ճիշտ ժամանակին, ապա խոսել այն բոլոր ձեռքբերումների մասին, որոնք ունեցանք այս ընթացքում: Հիմա իրավունք չկա որոշել ու ասել' դե դավայ, տղերք, եկեք ճանաչեք ԼՂՀ-ի անկախությունը:

 

 

-Պարոն Աղաբեկյան, որպես Արցախյան պատերազմի հերոս, որպես հրամանատար՝ ի՞նչ կարծիք ունեք Ազատության հրապարակում և ՀՀ այլ մարզերում ազատամարտիկների կողմից իրականացվող բողոքի ակցիաների մասին, արդյոք Դուք մեղադրո՞ւմ եք նրանց այդ քայլի համար:

 

 

-Անկեղծ ասած, չեմ ուզում տեսակետ հայտնեմ ու ապատեղեկացված իմ ժողովրդին կրկին ապատեղեկացնել: Իմ անձնական կարծիքը հետևյալն է, որ, ցավոք սրտի, մենք ժամանակին չենք կարողացել ճիշտ մոտեցում ցուցաբերել պատերազմի մասնակցի կարգավիճակի շուրջ, չենք կարողացել ճիշտ մոտեցում ցուցաբերել «ազատամարտիկ» կոչումի հետ կապված, սխալներ ենք թույլ տվել ժամանակին և այսօր այն, ինչ տեղի է ունենում ՀՀ-ում, դա այն սխալների արդյունքն է, որը թույլ ենք տվել տարիներ առաջ:

 

 

Եթե մենք ուշադիր նայենք' արդյոք մեր զինկոմիսարիատներում հաշվառված են այդ ազատամարտիկները, արդյոք նրանց մարտական ուղին ֆիքսված է նրանց անձնական գործում, թե՞ ոչ, իհարկե' ոչ:

 

 

Այդ պարագայում այնքան հեշտ է, որ ամեն մեկն իրեն պատերազմի մասնակից հայտարարի, ես մի անգամ կատակով ասել եմ' մեր զինվորներից յուրաքանչյուրին եթե հարցնես՝ ինչ ես արել պատերազմում, նա կմեջբերի մի ռազմական գործողություն և կասի՝ եթե ես այդ օրն այդտեղ չլինեի, այսօր մեր երկիրն այսքան ազատ չէր լինի:

 

 

Ինչևէ, լավ է ուշ, քան ավելի ուշ: Այսօր ընձեռված է այդ հնարավորությունը, որ ազատամարտիկները կարողանան իրենց մարտական ուղին կազմեն, հաշվառվեն, ի վերջո գնահատվեն, այդ հստակեցումներից հետո ապատեղեկատվություն չի լինի:



Սեդա Ղուկասյան